«Կարս-Իգդիր-Նախիջևան երկաթգծի ստեղծման նախագիծը գտնվում է մշակման փուլում». թուրք նախարար

Կարս-Իգդիր-Նախիջևան երկաթգծի ստեղծման նախագիծը գտնվում է մշակման փուլում: Այդ մասին հայտարարել է Թուրքիայի տրանսպորտի և հաղորդակցության նախարար Մեհմեդ Ջահիդ Թուրհանն ադրբեջանական Trend գործակալությանը տված հարցազրույցում:
«Ինչպես հայտնի է՝ Կարս-Իգդիր-Նախիջևան երկաթգիծը Բաքու-Թբիլիսի-Կարս երկաթուղային նախագծի շարունակությունն է», – ասել է թուրք նախարարը՝ նշելով, որ այժմ իրենք գտնվում են ծրագրի նախագծման ու աշխատանքների նախապատրաստական փուլում:
«Դեպի Նախիջևան ու Իրան ելքով այս երկաթգծի կառուցումը թույլ կտա կապել այս տարածքն «Արևելք-Արևմուտք» երկաթուղային միջանցքի հետ՝ Էդիրնե, Ստամբուլ, Էսքիշեհիր, Անկարա, Յոզղատ, Սվաս, Էրզինջան, Էրզրում ու Կարս քաղաքների միջոցով»,- մանրամասնել է Թուրհանը:
Նշենք, որ Բաքու-Թբիլիսի-Կարս երկաթգիծը կառուցվել է ադրբեջանա-վրացա-թուրքական միջպետական համաձայնագրի հիման վրա։

https://www.tert.am/am/news/2018/10/23/turkey-azerbaidjan/2825653