Ստամբուլում մեկնարկում են Համշենի հայերենի բարբառն ուսուցանող դասընթացներ

Ստամբուլում գործող համշենական ՀԱՏԻԿ միության նախաձեռնությամբ Համշենի հայկական բարբառն ուսուցանող դասընթացներ կմեկնարկեն, այս մասին տեղեկացնում է Bianet.org-ը:
Հայտնի է, որ միության անդամներին ու Համշենի բարբառը սովորել ցանկացող բոլոր անձանց այստեղ համշենահայերեն կդասավանդեն համշենցի մտավորականներ Մահիր Օզքանն ու Շաբան Ալթայը:
Նշենք, որ դեռ անցյալ տարվանից ՀԱՏԻԿ միության շենքում սկսվել էին համշենական պարերի ուսուցման դասընթացներ, որոնք շարունակվում են մինչ օրս:
«Իրականում դասընթացները մեզ բոլորիս միավորելու միջոց են: Նպատակը միայն լեզուն սովորելն ու համշենական մշակույթը հասկանալը չէ, բուն նպատակը ավելի շատ մեր հայրենի մշակույթի ու համշենականության շուրջ կենտրոնանալն է: Մեր դռները բաց են բոլոր նրանց առաջ, ում սիրտը զարկում է Համշենի համար», – ասում է միության անդամներից Նեշենուր Ալթունքայան:

https://www.tert.am/am/news/2018/10/22/hamshen-istanbul/2824972