Արևմտահայոց հարցերի ուսումնասիրության կենտրոնում տեղի կունենա «Վերջին ցանկությունս. պոլսահայ Բրենդա Ժամկոչյան-Բաշարի հիշատակին» գրքի շնորհանդեսը

Սույն թվականի հոկտեմբերի 15-ին, ժամը 14:00-ին Արևմտահայոց հարցերի ուսումնասիրության կենտրոն գիտահետազոտական հիմնադրամում կկայանա ամերիկահայ բարեգործ Հերման Խնդիրեանի և Հայոց ցեղասպանությունը ճանաչած ու այդ թեմայով բազմաթիվ գրքերի հեղինակ` գերմանաբնակ թուրք մտավորական Քեմալ Յալչընի «Վերջին ցանկությունս. պոլսահայ Բրենդա Ժամկոչյան-Բաշարի հիշատակին» գրքի շնորհանդեսը:

Akunq.net-ի փոխանցմամբ` Գերմանիայում միաժամանակ երկու լեզուներով` թուրքերեն և հայերեն լույս տեսած սույն գրքի թարգմանիչը կենտրոնի աշխատակիցներից թուրքագետ Մելինե Անումյանն է: Գրքում ներկայացվում է Ստաբուլից Գերմանիա տեղափոխված պոլսահայ մտավորական Բրենդա Ժամկոչյանի կյանքի պատմությունը, ով Թուրքիայում լինելով հայ համայնքի ներկայացուցիչ և բախվելով այստեղ փոքրամասնություն լինելու հետ կապված բոլոր խնդիրներին` փորձել է Գերմանիայում օգտակար լինել տեղի փոքրամասնության ներկայացուցիչներին, հատկապես` իր սաներին: Բրենդային ընթերցողներին ներկայացնում են նաև իր ընկերները և ուսանողները:

Մասնագիտությամբ ուսուցիչ և դասախոս եղած Բրենդա Ժամկոչյանի կտակի համաձայն` նա իր առանձնատունը նվիրել է Գյումրիում գործող «Թռչունյան տուն» մանկատուն-կրթահամալիրի սաներին: Բրենդայի ընկերների որոշմամբ` այս գրքի վաճառքից ստացված ամբողջ շահույթը ևս ուղղվելու է հիշյալ մանկատանը:

Շնորհանդեսին կմասնակցեն գրքի հեղինակները` Գյումրիի «Թռչունյան տուն» մանկատուն-կրթահամալիրի երկարամյա հովանավոր Հերման Խնդիրեանը և թուրք գրող Քեմալ Յալչընը, Գերմանիայից Հայաստան ժամանած Գարեգին արքեպիսկոպոս Բեկչյանը, ինչպես նաև` գրքի թարգմանիչ Մելինե Անումյանը:

Մուտքն ազատ է: Սիրով հրավիրում ենք բոլոր ցանկացողներին:

Ամսաթիվ` 2018 թ. հոկտեմբերի 15, ժամը` 14:00

Հասցե` ՀՅԴ Արամ Մանուկյանի անվան երիտասարդական կենտրոն, Գյուլբենկյան 38 (HSBC բանկի հարևանությամբ), 5-րդ հարկ

Akunq.net