Ադանայի պատմական Քազանչիների (Կաթսայագործների) շուկան, որն ավելի քան 500 տարվա պատմություն ունի, իրականում հայկական առևտրական կենտրոն է եղել: Ուղղակի 20-րդ դարասկզբի Հայոց ցեղասպանությունից հետո տեղի հայ արհեստավորները սկսել են աշակերտության վերցնել թուրքերի և արաբների: Աստիճանաբար իրենց տեղը զիջելով նրանց` լքել են շուկան: Այս մասին հայտնում է թուրքական Ozgur-gundem.com լրատվամիջոցը` ընդգծելով, որ թեև ժամանակի ընթացքում շատ բան է այստեղ փոխվել, բայց ըստ էության հայկականության հետքերը լիովին վերացնել չի հաջողվել:
«Օրինակ` շուկայի խորհրդանիշներից մեկը նախկինում եղել է հայկական Սուրբ Հակոբ եկեղեցին, որը վերածվել է մզկիթի: Իսկ քանի որ շրջակայքում հիմնականում հավաքվում էին յուղավաճառները, մզկիթիվ տրվել է «Յուղի մզկիթ» անունը: Թեև հետո ավելացվեցին աշտարակներ (մինարեներ), այդուհանդերձ նկատելի է մնում, որ նախկինում այն եղել է եկեղեցի»,- գրում է աղբյուրը:
Քազանչիների շուկայի Արհեստագործական պալատի նախագահ Իբրահիմ Արըքլըն շուկայի ներկայիս վիճակի մասին խոսելիս այն համեմատում է անդորրի մեջ ապրող գյուղի հետ: Արըքլըն նշում է, որ իր եռուզեռով նախկինում շուկան նման էր արդյունաբերական կենտրոն, իսկ այժմ դարձել է քեբաբ, ծխախոտ և հեռախոս վաճառողների հավաքատեղի:
Արըքլըն նաև ափսոսանք է հայտնել, որ շուկան հետաքրքրում է միայն լրագրողներին կամ ֆիլմ նկարահանել ցանկացող ռեժիսորներին:
Leave a Reply