Վանում հայկական գերեզմանոցի վրա կառուցված զուգարանը, ավտոկայանը և հանդերձարանն այդպես էլ չեն քանդվել, թեև դեռևս մեկ տարի առաջ այն ժամանակվա Թուրքիայի մշակույթի և զբոսաշրջության նախարար Նուման Քուրթուլուշը հայտարարել էր, թե դրանք վերացվելու են 60 օրվա ընթացքում: Այդ մասին, ըստ Akunq.net-ի, հաղորդում է քրդական թուրքալեզու «Մեզոպոտամիա» լրատվական գործակալությունը:
Աղբյուրի փոխանցմամբ`այդ շինություններն անցյալ տարի հայկական գերեզմանոցի վրա կառուցել էր տվել Վանի Էդրեմեթի (Արտամետ-Ակունքի խմբ.) քաղաքապետի պաշտոնակատար նշանակված Աթըֆ Չիչեքլին: Այդ փաստը բացասական արձագանքի էր արժանացել, որից հետո սույն հարցը ԹԱՄԺ-ի հայազգի պատգամավոր Կարո Փայլանի կողմից բերվել էր խորհրդարանի օրակարգ, և տվյալ ժամանակաշրջանի Թուրքիայի մշակույթի և զբոսաշրջության նախարարն ստիպված էր եղել այդ թեմայով հայտարարությամբ հանդես գալ` նշելով, թե այդ կառույցները կքանդվեն 60 օրվա ընթացքում:
Ի պատասխան` քաղաքապետի պաշտոնակատար Աթըֆ Չիչեքլին փորձել էր պնդել, թե տվյալ շրջանում ոչ մի հայկական գերեզմանոց չկա, և ընդգծել, թե որևէ կառույց չի քանդվելու:
Ինչպես հաղորդում է լրատվական գործակալությունը, չնայած նախարարի հայտարարությունից արդեն մեկ տարի է անցել, սակայն տվյալ շինությունները դեռ կանգուն են: Եւ թեև սույն հարցի վերաբերյալ որոշում է կայացրել նաև Թուրքիայի մշակութային արժեքների պահպանման խորհուրդը, բայց և այնպես որևէ քայլ չի ձեռնարկվել` այդ կառույցները քանդելու ուղղությամբ:
(Աղբյուր` Mezopotamya Ajansı)
Թարգմանեց Մելինե Անումյանը
Akunq.net
Leave a Reply