Երևանում տեղի կունենա ցեղասպանագետ Մարի Հովհաննիսյանի «Ուրացման քաղաքականության արմատները, նորօրյա դրսևորումները և դրանց հետևանքները» գրքի շնորհանդեսը

Հոկտեմբերի 4-ին, ժամը 16:00-ին Արևմտահայոց հարցերի ուսումնասիրության կենտրոնում կկայանա ցեղասպանագետ Մարի Հովհաննիսյանի «Ուրացման քաղաքականության արմատները, նորօրյա դրսևորումները և դրանց հետևանքները» գիրքը: Ուսումնասիրությունը կատարվել է Արևմտահայոց հարցերի ուսումնասիրության կենտրոն գիտահետազոտական հիմնադրամում և տպագրվել ՀՀ Սփյուռքի նախարարության դրամաշնորհով ու բարձր հովանավորությամբ: Այդ մասին հաղորդում է կենտրոնի Akunq.net պաշտոնական կայքէջը:

Աղբյուրի համաձայն` աշխատության մեջ ներկայացված են Հայոց ցեղասպանության թուրքական ժխտողականության քաղաքականության ակունքները, դրանց դրսևորումները Ցեղասպանության ընթացքում, 1965 թ. հետո և մեր օրերում: Ըստ հեղինակի` ժխտման հիմնական թեզերը, որոնք սկիզբ են առել դեռևս 1894-96 թթ. կոտորածների շրջանում, հիմնականում նույնն են մնացել հետագա տասնամյակների ընթացքում, սակայն փոխվել են դրանց ներկայացման մեթոդներն ու մեխանիզմները:

Գրքում Մ. Հովհաննիսյանի կողմից առաջ է քաշվում ցեղասպանագիտության մեջ նոր թեզ, ըստ որի` ցեղասպանության ժխտումն սկսվում է շատ ավելի վաղ, քան բուն հանցագործությունը:

Ուսումնասիրության երեք գլուխներում ամփոփված են ժխտողականության տեսությանը վերաբերող դրույթներ, Հայոց ցեղասպանության թուրքական ժխտողական քաղաքականության փուլերը, դրանց զարգացումները և հետևանքները:

Մենագրությունը հիմնված է հեղինակի կողմից առաջին անգամ գիտական շրջանառության մեջ դրվող արխիվային փաստաթղթերի, ժամանակի մամուլի, հասարակական-քաղաքական գործիչների հուշերի և մասնագիտական գրականության վրա:

«Էդիթ պրինտ» հրատարակչությունում տպագրված 168 էջանոց սույն աշխատության խմբագիրն է Արևմտահայոց հարցերի ուսումնասիրության կենտրոնի տնօրեն, հայագետ, բանասիրական գիտությունների թեկնածու Հայկազուն Ալվրցյանը:

Շնորհանդեսը տեղի կունենա Արևմտահայոց հարցերի ուսումնասիրության կենտրոնում:

Ամսաթիվ` 2018 թ. հոկտեմբերի 4, ժամը` 16:00

Հասցե` Գյուլբենկյան 38, 5-րդ հարկ

Մուտքն ազատ է: Հրավիրում ենք բոլոր ցանկացողներին:

Akunq.net