Դամասկոսի «Տումմար» մշակութային համալիրին մէջ տեղի ունեցած է յատուկ ձեռնարկ, որուն ընթացքին Սուրիոյ մշակոյթի նախարարութիւնը «Լուսամուտներ» նախաձեռնութեան ծիրին մէջ պատուած է Նորա Արիսեանի գիտական եւ թարգմանական գործերը:
«Լուսամուտներ» նախաձեռնութեան հիմնադիր Իտրիս Մուրատ ներկայացուցած է Արիսեանի կատարած մեծ ներդրումը սուրիական եւ հայկական մշակութային ոլորտներուն մէջ:
Իր խօսքին մէջ Նորա Արիսեան շնորհակալութիւն յայտնած է նման ձեռնարկի կազմակերպիչներուն` անդրադառնալով սուրիական գրականութեան ոլորտին եւ Ցեղասպանութեան հարցին մէջ իր կատարած աշխատանքներուն:
Սուրիոյ մշակոյթի նախարարութեան Թարգմանութեան բաժանմունքի տնօրէն Հուսամ Խատուր ներկայացուցած է Արիսեանի թարգմանական աշխատանքը, անոր լեզուական ու թարգմանական կարողութիւնները եւ բազմալեզու թարգմանութիւն կատարելու կարելիութիւնը` զայն նկատելով եզակի երեւոյթ, որ արժանի է մեծարանքի:
Խատուր նաեւ շեշտած է, որ Սուրիոյ խորհրդարանին մէջ Արիսեան կը ներկայացնէ նաեւ գրողներու եւ թարգմանիչներու խնդիրները:
Leave a Reply