Թուրքիոյ արտաքին գործոց նախարարութիւնը պատասխանած է Ֆրանսայի նախագահ Էմանուէլ Մաքրոնի` Թուրքիոյ Եւրոպական Միութեան անդամակցութեան անկարելիութեան վերաբերող յայտարարութիւններուն: Այս մասին կը հաղորդէ թրքական «Հիւրրիէթ» օրաթերթը:
Մաքրոն ըսած է, որ Թուրքիոյ իշխանութիւնները հակաեւրոպական ու փանիսլամական քաղաքականութիւն որդեգրած են, եւ այս պայմաններուն մէջ Թուրքիոյ` Եւրոպական Միութեան անդամակցութեան շուրջ բանակցիլը իմաստ չունի:
Թուրքիոյ արտաքին գործոց նախարարութեան հրապարակած յայտարարութեան մէջ թրքական կողմը խոր ափսոսանք յայտնած է Մաքրոնի խօսքերուն առնչութեամբ ու յիշեցուցած, որ Թուրքիան Եւրոպական միութեան հետ բազմակողմանի համագործակցութեան մէջ է թէ՛ ահաբեկչութեան, թէ՛ գաղթականներու ճգնաժամի դէմ պայքարի ծիրին մէջ:
Յայտարարութեան մէջ ըսուած է, որ Թուրքիան ջնջած է յեղաշրջման փորձէն ետք յայտարարուած արտակարգ դրութիւնը եւ բռնած նոր բարեփոխումներուն ուղին:
Թուրքիոյ արտաքին գործոց նախարարութիւնը նաեւ լուսարձակի տակ առած է Մաքրոնի` իսլամութեան եւ իսլամական ծայրայեղականութեան վերաբերեալ օգտագործած եզրերուն` շեշտելով, որ սխալ կը համարեն «չարիքը որեւէ կրօնի հետ կապելը»:
Leave a Reply