Դերսիմ մեկնած Ժողովուրդների դեմոկրատական կուսակցության պատգամավորներից բաղկացած պատվիրակությանն արգելվել է Օվաջըք և Խոզաթ գավառներից մուտք գործել հրդեհի գոտի: Որպես արգելքի հիմնավորում բերվել է այն պատճառաբանությունը, թե «տվյալ տարածքներում թուրքական զինուժը գործողություն է իրականացնում ՊԿԿ-ի մարտիկների դեմ»: Որոշ ժամանակ նստացույց արած պատվիրակության անդամները փորձել են նաև Բերդակ գավառից մտնել Դերսիմի հրդեհված շրջաններ, սակայն նրանց այդ նախաձեռնությունը ևս կանխվել է անվտանգության ուժերի կողմից:
Այդ մասին, ըստ Akunq.net-ի, հաղորդում է քրդական թուրքալեզու «Մեզոպոտամյա» լրատվական գործակալությունը:
Քանի որ բանակցությունները որևէ արդյունք չեն տվել, Ժողովուրդների դեմոկրատական կուսակցության պատգամավորներից բաղկացած պատվիրակությունը փորձել է նաև այլընտրանքային ուղով մտնել արդեն մի քանի շաբաթ այրվող դերսիմյան շրջաններ: Խոզաթ-Չիչեքլի գյուղի ճանապարհին մեկ անգամ ևս թուրք զինվորների և ոստիկանության արգելքին հանդիպած HDP կուսակցության անդամները նստացույց են արել ցամաքային ճանապարհի վրա:
Հիշեցնենք, որ դեռևս օգոստոս ամսվա առաջին տասնօրյակին Դերսիմի անտառներում բռնկված հրդեհներն անընդհատ անտեսվում են թուրքական իշխանությունների կողմից, հրդեհներ, որ բռնկվել են ոչ թե եղանակային պայմանների, այլ` ՊԿԿ-ի դեմ պայքարող Թուրքիայի զինուժի հրթիռակոծությունների հետևանքով։
Թարգմանեց Մելինե Անումյանը
Akunq.net
Leave a Reply