Թուրքիայի իշխանություններն անտեսում են Դերսիմում բռնկված անտառային հրդեհները

Թուրքիայի Դերսիմ (Թունջելի) նահանգի մի շարք շրջաններում արդեն 15 օր շարունակվում են անտառային հրդեհները։ Տեղական իշխանություներն էլ չեն շտապում որևէ միջոցներ ձեռնարկել։ Բռնկված հրդեհների դեմ չի մղվում պայքար ոչ՛ օդից, ոչ՛ ցամաքից։

Ընդ որում այդ հրդեհներն առաջացել են ոչ թե եղանակային պայմանների, այլ Թուրքիայի զինված ուժերի հրթիռակոծությունների հետևանքով։ Իսկ ինչպես հայտնի է, Դերսիմում կան Քուրդիստանի բանվորական կուսակցության (ՔԲԿ-PKK) զինյալներ, ովքեր Թուրքիայում համարվում են ահաբեկիչներ։ Հավանական է, որ Թուրքիայի զինված ուժերի թիրախում հենց քուրդ զինյալներն են եղել։

Տեղի բնակիչները ստիպված սեփական ուժերով են պայքարում հրդեհների դեմ։ Մի խումբ բնակիչների հաջողվել է վերահսկողության տակ առնել հրդեհված գոտու մի մասը, բայց վտանգն ի սպառ վերացած չէ։

Դեպքի վայր է մեկնել Թուրքիայի քրդամետ Ժողովուրդների դեմոկրատական կուսակցության (ԺԴԿ-HDP) պատվիրակությունը, որի կազմի մեջ է Դիարբեքիրի պատգամավոր Սալիհա Այդենիզը։

Աղբյուր` Alevi.net

Ermenihaber.am