Արդվինի միջնադարյան ամրոցը կբացվի զբոսաշրջիկների համար

Մեծ Հայքի Տայոց աշխարհում գտնվող Արդվինի (Արտվին) միջնադարյան ամրոցը Ճորոխ գետի ափին բացվելու է զբոսաշրջիկների համար։

Արդվինի ամրոցը նախկինում արգելված էր այցելել, քանի որ գտնվում էր ռազմական տարածքում, բայց այժմ այն պատրաստվում են բացել բոլորի համար։

Նշենք, որ Արդվինը դարեր շարունակ հայաբնակ է եղել։ IX—XI դարերում Արդվինը մտնում էր Բագրատունիների իշխանության, XI—XIII դարերում՝ Վրաց Բագրատունիների թագավորության մեջ, XIII դարի 30-ական թվականներին գրավել են մոնղոլ-թաթարները, իսկ 1555 թվականին՝ օսմանյան թուրքերը։

XX դարի սկզբին նրա ամբողջ բնակչությունը 8000 շունչ էր, որից մոտ 7000-ը՝ հայեր: 1921 թվականին, երբ Արդվինը Ռուսաստանից նորից անցավ Թուրքիային, հայերը գաղթեցին և վերաբնակեցվեցին Վրաստանում, Աբխազիայում և Խորհրդային Հայաստանում։

Հայերը զբաղվում էին արհեստներով ու առևտրով։ Ամենատարածված արհեստներից էին մանածագործությունն ու ջուլհակությունը, փայտամշակումը՝ հյուսնությունն ու ատաղձագործությունը։

XX դարի սկզբներին ուներ 5 եկեղեցի՝ Ս. Աստվածածին, Պողոս–Պետրոս, Գր. Լուսավորիչ, Ս. Խաչ և առաքելական Ս. Աստվածածին անունները։ Յուրաքանչյուր եկեղեցուն կից XIX դ. վերջերին և ХХ-ի սկզբներին կար դպրոց։

http://westernarmeniatv.com/hy/29024.html