Թուրքիայի ԱԳ նախարար Մեւլութ Չավուշօղլուն հայտարարել է, որ Անկարան չի փոխել Հայաստանի եւ ղարաբաղյան հակամարտության հարցով քաղաքականությունը: Այս մասին գրում է ՌԻԱ Նովոստին:
«ՆԱՏՕ-ի գագաթնաժողովի ժամանակ ես հանդիպեցի Զոհրաբ Մնացականյանի հետ: Ես նրա հետ ծանոթ եմ դեռեւս այն ժամանակից, երբ նա ԵԽ-ում Հայաստանի դեսպանն էր: Շնորհավորեցի նրան եւ Հայաստանի վարչապետ Փաշինյանին… Մեր դիրորոշումը հայտնի է, մենք չենք փոխել այն: Հայտնի է նաեւ մեր դիրքորոշումը Ղարաբաղի հարցով»,- հայտարարել է Չավուշօղլուն:
Հայ-թուրքական հարաբերությունների կարգավորման գործընթացը մեկնարկել է 2008 թվականի աշնանը՝ այն ժամանակ ՀՀ նախագահ Սերժ Սարգսյանի նախաձեռնությամբ: 2009-ի նոյեմբերին Հայաստանի եւ Թուրքիայի ԱԳ նախարարները Ցյուրիխում «Դիվանագիտական հարաբերությունների հաստատման մասին արձանագրություն» եւ «Երկկողմ հարաբերությունների զարգացման մասին արձանագրություն» ստորագրեցին, որոնք պետք է վավերացվեին երկու երկրների խորհրդարանների կողմից: Սակայն արդեն 2009 թվականի դեկտեմբերին այն ժամանակ Թուրքիայի վարչապետ Ռեջեփ Էրդողանը հայտարարեց, որ Անկարան դրանք չի վավերացնի՝ առանց ղարաբաղյան հիմնախնդրի լուծման:
2010 թվականի ապրիլի 22-ին Սերժ Սարգսյանը հայ-թուրքական արձանագրությունների վավերացման գործընթացը դադարեցնելու մասին հրամանագիր ստորագրեց՝ հայտարարելով, որ Թուրքիան պատրաստ չէ շարունակել սկսված գործընթացը, իսկ 2015-ի փետրվարի 16-ին հետ կանչեց դրանք խորհրդարանի օրակարգից, 2018 թվականի մարտի 1-ին՝ չեղարկեց:
Սերժ Սարգսյանը հայտարարեց, որ Հայաստանն ամեն ինչ արեց հայ թուրքական հարաբերությունների կարգավորման հարցն ապագա սերունդներին չթողնելու համար, սակայն, նրա կարծիքով, Անկարան «ոչ մի քայլ չարեց փաստաթղթերի վավերացման եւ ուժի մեջ մտնելու համար»:
Leave a Reply