Թուրքիայում ապստամբության դեմ հաղթանակի օրը տոնում են նաև Մոսկվայում. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ 2016 թ. հուլիսի 15-16-ին երկրում պետական հեղաշրջման փորձի ձախողումը թուրք ժողովրդի և աշխարհում բոլոր ճնշվածների հաղթանակն է, և այդ տարեթիվը տոնում են նաև Մոսկվայում: «Մենք երբեք չենք մոռանա և թույլ չենք տա մոռանալ հուլիսի 15-ը. դա մեր երկրի պատմության մեջ պատմական տարեթիվ է: Դա ազգի վերածննդի, իր դեմ հարձակմանը դիմադրության մարմնավորումն է: Դա մեր ամբողջ ժողովրդի, աշխարհում բոլոր ճնշվածների հաղթանակն է: Պատկերացնում եք՝ Մոսկվայում ևս տոնում են այս օրը»,- ասել է Էրդողանը ռազմական հեղաշրջման փորձի ձախողման երկրորդ տարելիցի կապակցությամբ Ստամբուլում բազմահազարանոց հանրահավաքին ելույթ ունենալիս: Վերջինս նշել է, որ իսլամի ընդդիմադիր քարոզիչ Ֆեթուլլահ Գյուլենի (պաշտոնական Անկարան մեղադրում է հեղաշրջման փորձի կազմակերպման համար) «FETO» կազմակերպության դեմ պայքարը շարունակվելու է այնքան ժամանակ, քանի դեռ նրա վերջին անդամը «հաշիվները չի վճարել»: Ըստ Էրդողանի՝ հուլիսի 9-ին իր երդմնակալության արարողությունից հետո երկրի կառավարման նախագահական համակարգին անցումը կուժեղացնի Թուրքիային:

Պետական հեղարշրջման փորձի տապալման առնչությամբ միջոցառումներն անցկացվել են Թուրքիայի ամբողջ տարածքում: Հուլիսի 15-ը Թուրքիայում հայտարարվել է ազգային տոն՝ Ժողովրդավարության և ազգային միության օր:

Ավելի վաղ նախագահ Ռեջեփ Թայիփ Էրդողանը իր ռուսաստանցի գործընկեր Վլադիմիր Պուտինին շնորհակալություն էր հայտնել Թուրքիայում ռազմական հեղաշրջման փորձի ժամանակ տրամադրած աջակցության համար:

http://ankakh.com/article/100553/%E2%80%8Bthurqiayum-apstambuthyan-dyem-haghthanaki-ore-tvonum-yen-nayev-mvoskvayum–erdvoghan