Թուրքիայի մեջլիսի հայ պատգամավոր Գարո Փայլանը, ով հունիսի 24-ին կայանալիք խորհրդարանական ընտրություններում Ժողովուրդների դեմոկրատական կուսակցության կողմից առաջադրված է Դիարբեքիրից, թուրքական Bianet.org կայքին տված հարցազրույցում խոսել է իր դեմ երկրի քրեական օրենսգրքի տխրահռչակ 301-րդ հոդվածով սկսված հետաքննությունից:
Ինչպես հաղորդում է «Արմենպրես»-ը, Փայլանը նշել է, որ 301-րդ հոդվածն է դարձել պոլսահայ լրագրող Հրանտ Դինքի մահվան պատճառը:
«Հայոց ցեղասպանության մասին խոսելու համար իմ դեմ, «թուրքականությունը վիրավորելու» հիմնավորմամբ, հետաքննություն է սկսվել: Իրականում, սակայն, Հայոց ցեղասպանությունը հերքելն է վիրավորանք: Անվանեք ինչպես ուզում եք՝ հայերի հետ տեղի ունեցած Մեծ ողբերգությունը հերքելը վիրավորում է թուրքականությունը»,- նշել է նա:
Փայլանը կրկին ընդգծել է՝ ողջ աշխարհն է տեղյակ, որ հայ ժողովուրդը ոչնչացվել է: «Անատոլիայում ամեն հինգից մեկն էինք, իսկ հիմա անգամ հազարից մեկը չենք: Մեր հազարավոր եկեղեցիները, դպրոցները, մշակութային ժառանգությունը` ամեն բան կորցրել ենք: Մենք առաջարկում ենք՝ ինքներդ անվանեք տեղի ունեցած դեպքերը: Ասում ենք՝ արդար հիշողության վրա հիմնված անուն դրեք կատարվածին: Սակայն մեզ տրվող պատասխանը մշտապես հետևյալն է. «Դու չես կարող այս ամենի մասին խոսել»: Ու նմանօրինակ պայմաններում ստացվում է, թե վիրավորում ես թուրքականությունը: Ստացվել է այնպես, որ թուրքերն աշխարհում ընկալվում են, որպես Ցեղասպանությունը հերքողներ: Իսկ ես, հակառակը, պայքարում եմ թուրքերի դեմ այդ անարդարությունը վերացնելու համար»,- ասել է մեջլիսի պատգամավորը:
https://armenpress.am/arm/news/938036.html
Leave a Reply