Սփիր Ցեղասպանութեան հարցը օրակարգի բերաւ քոնկրեսական քննարկումի մը ընթացքին

ՈՒԱՇԻՆԿԹԸՆ.- Ամերիկայի Հայ Դատի յանձնախումբը կը հաղորդէ, թէ մայիս 9ին տեղի ունեցած Ներկայացուցիչներու տան Զինուորական սպասարկութեանց յանձնախումբի նիստին, Քոնկրեսի Հայկական համախմբումի համաատենապետ Ճեքի Սփիր շեշտած է Միջին Արեւելքի մէջ բռնարարքներու կասեցման ջանքերուն ընթացքին Հայոց Ցեղասպանութեան դասերէն օգտուելու կարեւորութիւնը։

Յիշեցնելով, որ իր նախահայրերը եւս Հայոց Ցեղասպանութեան զոհերուն շարքին եղած են՝ Սփիր շեշտած է, թէ Միացեալ Նահանգներու բարոյական պարտաւորութիւնն է օգնել այլ երկիրներու, որ լիուլի հասկնան ցեղասպանութեանց հետեւանքները, որպէսզի կարելի ըլլայ անոնց առաջքը առնել։

Քոնկրեսական Սփիրի վկայութենէն հատուած մը կարելի է դիտել՝ այցելելով https://youtu.be/iHcqBEQbBx8 կայքէջը։

Ամերիկայի Հայ Դատի յանձնախումբի գործադիր վարիչ Արամ Համբարեան շնորհակալութիւն յայտնեց Սփիրին, որ դարձեալ լուսարձակի տակ առած է Հայոց Ցեղասպանութեան եւ անկէ դասեր քաղելու հարցը, եւ աւելցուց, որ Սփիր արդէն իսկ Հայոց Ցեղասպանութեան ճանաչումը պահանջող Ներկայացուցիչներու տան թիւ 220 բանաձեւին վաւերացումը ապահովելու ջատագովներէն մէկն է։

Յիշեցնենք, որ քոնկրեսականներ Տէյվ Թրաթի եւ Էտըմ Շիֆի կողմէ առաջ մղուող թիւ 220 բանաձեւը արդէն իսկ ապահոված է 118 քոկրեսականներու հովանաւորութիւնը։

Asbarez.com