Թուրքիայի ընդդիմադիր, քեմալական Հանրապետական ժողովրդական կուսակցության կողմից նախագահի առաջիկա ընտրություններում թեկնածու առաջադրված Մուհարեմ Ինջեն այցելել է բանտում գտնվող մեկ այլ թեկնածուի՝ քրդամետ Ժողովուրդների դեմոկրատական կուսակցության կողմից առաջադրված Սելահաթթին Դեմիրթաշին: Ինչպես հաղորդում է «Արմենպրես»-ը, այս մասին հայտնում է թուրքական Diken պարբերականը:
Այցելությունից հետո փաստաբանների միջոցով հայտարարություն տարածած Դեմիրթաշը շնորհակալություն է հայտնել Ինջեին՝ նշելով, որ երկար ժամանակ Թուրքիայում ամեն ոլորտում առկա անարդարությունը նախընտրական շրջանում ևս շարունակվում է:
Քրդամետ կուսակցության թեկնածուն, ով 2016 թ. նոյեմբերից բանտում է, շեշտել է, որ իրեն ու մյուս կալանավորված քաղաքական գործիչներին բանտում գերի են պահում՝ հավելելով. «Դժբախտաբար, ազատությունն էլ կիսաբաց ռեժիմի բանտից շատ տարբեր չէ»:
«Հույս ունեմ և ցանկանում եմ, որ ի հեճուկս այս անարդար մրցակցության՝ ընտրությունները երկրում ժողովրդավարության, ազատությունների և խաղաղության սկիզբ դառնան»,- նշել է Դեմիրթաշը:
Դեմիրթաշը 2016 թ. նոյեմբերից գտնվում է Էդիրնեի բանտում: Նա մեղադրվում է «ահաբեկչական խմբավորում ստեղծելու և ղեկավարելու, հանցախմբի քարոզչություն իրականացնելու, հանցանքն ու հանցավորին գովաբանելու» մեջ: Նրա դեմ հարուցված մի քանի դատական գործերով գործչին սպառնում է մինչև 142 տարվա ազատազրկում:
Նախընտրական քարոզարշավի ընթացքում նրան ազատ արձակելու պահանջով կուսակցությունը դիմել է բարձրագույն ընտրական հանձնաժողովին՝ հայտնելով, որ առաջիկայում պատրաստվում են դիմել նաև Սահմանադրական դատարան, ապա նաև` Մարդու իրավունքների եվրոպական դատարան:
Սելահաթթին Դեմիրթաշը մասնակցել էր 2014 թ. նախագահական ընտրություններին՝ հավաքելով 7 տոկոս ձայն:
Leave a Reply