Թուրքիայի նորաստեղծ ընդդիմադիր Լավ կուսակցության հիմնադիր ու առաջնորդ Մերալ Աքշեները հարցազրույց է տվել բրիտանական հեղինակավոր “The Guardian” պարբերականին՝ խոսելով Թուրքիայում սպասվելիք արտահերթ նախագահական ու խորհրդարանական ընտրությունների մասին։
The Guardian-ը, որն Աքշեներին անվանել է Թուրքիայի «երկաթե լեդի», նշում է, որ վերջինը կարող է լինել Էրդողանի լրջագույն մրցակիցը նախագահական ընտրությունների հատկապես երկրորդ փուլում։
«Ես առաջինն էի, որ հայտարարեցի Էրդողանի դեմ իմ թեկնածության մասին այն ժամանակ, երբ դեռևս խոսք չկար արտահերթ ընտրությունների մասին։ Ես ի սկզբանե նույն բանն էի ասում․ ամեն մի քաղաքական ուժ պետք է իր թեկնածուին ձայն տա, իսկ երկրորդ փուլում, մի կողմ դնելով ընդդիմության ներքին տարաձայնությունները, հանուն մեր երկրի ու ժողովրդավարության` միավորվի մեկ թեկնածուի շուրջ»,-նշել է Աքշեները՝ ընդգծելով նաև կին քաղաքական գործիչ լինելու հանգամանքը:
«Այժմ թող պալատի տղամարդիկ վախենան»,-ասել է քաղաքական գործիչը։
Աքշեները հունիսի 24-ին սպասվող ընտրությունները որակել է որպես երկրի պատմության «ամենակարևոր ընտրությունը»։
«Միանձնյա իշխանության մոդելը շատ բան կորցնել կտա երկրին։ Թուրքիայում ժողովրդավարական նորմերը համապատասխան կերպով չեն իրականացվում։ Մենք պետք է վերականգնենք օրենքի գերակայությունն ու անկախ արդարադատական համակարգը»,-ասել է թուրք քաղաքական գործիչը։
Հիշեցնենք, որ Թուրքիայում ընտրություններին ընդառաջ դաշինք է կազմվել երկրի գլխավոր ընդդիմադիր ուժը համարվող Ժողովրդահանրապետական, Մերալ Աքշեների Լավ կուսակցության, ինչպես նաև երկրում գործող Դեմոկրատական ու Երջանկություն կուսակցությունների միջև։
Ըստ ձեռք բերված համաձայնության՝ ընտրությունների առաջին փուլում ընդդիմադիր կուսակցություններից յուրաքանչյուրն առաջադրելու է իր թեկնածուին, իսկ երկրորդ փուլում բոլորը պետք է աջակցեն նրանցից ամենաշատ ձայներ ստացած թեկնածուին:
Leave a Reply