Թուրքիայի ՆԳ նախարարը «անընդունելի» է որակել Ստամբուլում հայկական եկեղեցու վրա իրականացված հարձակումը

Թուրքիայի ներքին գործերի նախարար Սուլեյման Սոյլուն հատուկ հայտարարություն է տարածել Ստամբուլի Քադըքյոյ շրջանում հայկական Սուրբ Թագավոր եկեղեցու վրա կատարված ազգայնական հարձակման վերաբերյալ։

Ինչպես փոխանցում է թուրքական «Ջումհուրիյեթ» պարբերականը, Սոյլուն դատապարտել է տեղի ունեցածը՝ հարձակումն անվանելով «անընդունելի»։

Հայտնի է, որ Սոյլուն դեպքի առնչությամբ զանգահարել է Պոլսո Հայոց պատրիարքի փոխանորդ Արամ Աթեշյանին ու Սուրբ Թագավոր եկեղեցու հիմնադրամի նախագահ Արամ Բյուքյուջույանին։

Նախարարը նաև խոստացել է, որ իրավապահ մարմինները կանեն հնարավոր ամեն բան՝ հանցագործին գտնելուու պատասխանատվության ենթարկելու համար։

Հիշեցնենք, որ անցյալ գիշեր «Էրզրումցի 25» անունով գրությունը թողած անձը եկեղեցու պարիսպի վրա թուրքերենով գրել է․ «Այս հայրենիքը մերն է»։ Բացի այդ՝ նա մեծ քանակությամբ աղբ է լցրել եկեղեցու բակում՝ փակելով դրա մուտքը։

Հայտնի է, որ եկեղեցու ղեկավարութունը վերծանել ու ոստիկանությանն է փոխանցել տեղում աշխատող անվտանգության տեսախցիկի ֆիքսած տեսագրությունը։ Դեպքի առիթով ընթանում է հետաքննություն։

Սուրբ Թագավոր եկեղեցու մոտ սահմանվել է ոստիկանական խստացված վերահսկողություն, նետված աղբը մաքրվել է, իսկ ազգայնական գրությունը ջնջվել է եկեղեցու պարսպից։

«Այս խայտառակությունը ծրագրված կերպով է իրականացվել։ Բայց մի բան չեն հաշվարկել․ այս խայտառակությունը Հայոց ցեղասպանության իրական լինելու նոր ու շատ վստահելի մի ապացույց է պարունակում»,-միջդեպին անդրադառնալով նշել էր թուրք մտավորական և լուսանկարիչ Ահմեդ Քուզիքը։

http://www.tert.am/am/news/2018/05/01/kadikoy/2675571