Ստամբուլի Քադըքյոյ շրջանի հայկական եկեղեցու պատին ռասիստական բնույթի գրառման հեղինակը ձերբակալվել է

Ստամբուլի Քադըքյոյ (պատմական Քաղկեդոն-Ակունքի խմբ․) շրջանի հայկական Սուրբ Թագավոր եկեղեցու պարսպին ռասիստական բնույթի գրառման հեղինակը ձերբակալվել է։ Այդ մասին, ըստ Akunq.net-ի, հաղորդում է CNN Türk-ը։

Աղբյուրի համաձայն՝ Քադըքյոյ շրջանի իրավապահ մարմինները, անվտանգության տեսախցիկի արձանագրած տեսագրությունը դիտելուց հետո, բացահայտել են եկեղեցու պատին գրառում կատարած անձի ինքնությունը, հետևել նրան և ձերբակալել։

Հետաքննության արդյունքում պարզվել է, որ կասկածյալը “հոգեբանական խնդիրներ ունի և նախկինում 2 անգամ ինքնասպանության փորձ է կատարել”։ Տվյալ դեպքի առնչությամբ բացահայտվել է, որ կասկածյալը հանցանքը կատարելուց հետո թաքնվել է մի լքված շենքի տանիքում և անջատել հեռախոսը, որպեսզի իրեն չկարողանան գտնել։

Կասյածյալն իր ցուցմունքում նշել է, թե “միայնակ է գործել, և որ իբր եկեղեցու աշխատակիցներն իրեն վատ են վերաբերվել”։

Հիշեցնենք, որ մինչ այս, անհայտ անձը կամ անձինք Ստամբուլի Քադըքյոյ շրջանի Սուրբ Թագավոր հայկական եկեղեցու պարսպի վրա թուրքերենով գրել էին․ «Այս հայրենիքը մերն է»։ Բացի այդ՝ նրանք մեծ քանակությամբ աղբ էին լցրել եկեղեցու բակում՝ փակելով դրա մուտքը։

Թարգմանեց Մելինե Անումյանը

Akunq.net