Թուրքական Artigercek.com կայքը, անդրադառնալով Հայոց ցեղասպանությանը, Թուրքիայում հայ համայնքի ներկա վիճակի ու Ցեղասպանության ճանաչման խնդրի շուրջ հարցեր է հղել պոլսահայ մտավորականներ Բագրատ Էստուկյանին, Եդվարդ Տանձիկյանին ու Անժել Դիքմեին:
«Թուրքիան 103 տարի անց» վերնագրված հոդվածում հայ մտավորականները փաստել են, որ վերջին տարիներին Թուրքիայում Հայոց ցեղասպանության խնդրի շուրջ բաց քննարկումների, ցավակցության արտահայտման ու անցյալի հետ առերեսման հարցում առաջխաղացումն ակնհայտ է, թեև այս պահին Թուրքիայում քաղաքական լարված իրավիճակն անդրադառնում է նաև հայ համայնքի վրա:
Ստամբուլում հրատարակվող «Ակօս» հայկական պարբերականի հայերեն էջերի խմբագիր Բագրատ Էստուկյանն իր խոսքում շեշտել է, որ շուրջ 10 տարի է, ինչ հայ համայնքն արդեն կարողանում է առավել ազատ կերպով հիշատակի միջոցառումներ կազմակերպել Թուրքիայի տարբեր քաղաքների փողոցներում:
Ըստ Էստուկյանի՝ դա բավական դրական առաջխաղացում է:
«Նախագահ Էրդողանն արդեն մի քանի տարի է` ապրիլի 24-ին ուղերձ է հղում հայ համայնքին: Սակայն դրանցից ոչ մեկում ցեղասպանություն բառը չի կիրառվում: Նա «աքսոր» է ասում: Սակայն հասարակության ներսում կամաց-կամաց այս հարցը լսելի է դառնում և արձագանք գտնում: 1915-ն այլևս հեշտ մոռացվելիք, մոռացության տրվելիք թեմա չէ», – ասել է Էստուկյանը:
Ըստ լրագրող Անժել Դիքմեի՝ անկարելի է ցեղասպանություն չապրած ժողովուրդներից պահանջել հասկանալ ու ամբողջությամբ ըմբռնել հայերի ցավը:
«Չծննդաբերած մեկին կարո՞ղ ես բացատրել ծննդաբերության ցավը, չես կարող: Ցեղասպանության չենթարկված ժողովրդի՝ մեր ցավը հասկանալն էլ անհնարին է: Գուցե մենք էլ պետք է դադարենք սպասել, որ մյուսները պետք է մեզ հասկանան», – ասել է Դիքմենը:
«Ակօսի» գլխավոր խմբագիր Եդվարդ Տանձիկյանն էլ իր հերթին ընդգծում է, որ հայ համայնքը երկրի համար բավական ծանր ու լարված քաղաքական ժամանակաշրջանում մի կողմից հիշատակի միջոցառումներ է իրականացնում, մյուս կողմից էլ՝ լարված սպասում դրա արձագանքներին:
«Մի կողմից հիշատակի միջոցառումներ են աշխատում անել, մյուս կողմից ապրում են այն վախը, թե «տեսնենք, թույլտվություն կտրվի՞, այս մասին կխոսվի՞, և եթե խոսվի՝ որքա՞ն կխոսվի»: Այսինքն՝ մի խառը հոգեվիճակ է առկա», – նշում է Տանձիկյանը:
Leave a Reply