Մոմավառություն Սպիտակ տան առջև

Ապրիլի 21-ին Վաշինգտոնում կազմակերպվել էր Հայոց ցեղասպանության զոհերի հիշատակին նվիրված մոմավառություն:

ԱՄՆ-ի մայրաքաղաք Վաշինգտոնում՝ Սպիտակ տան առջև, քիչ առաջ ավարտվեց Հայոց ցեղասպանության զոհերի հիշատակին նվիրված մոմավառությունը:

Վաշինգտոնի հայ համայնքի կողմից կազմակերպված մոմավառությանը մասնակցում էին ԱՄՆ-ի Հայ դատի հանձնախմբի անդամներ, սկաուտներ, քաղաքացիներ, ինչպես նաև՝ Հայաստանի բարեկամներ:

«Ես այստեղ եմ, որպեսզի աջակցությունս հայտնեմ, պայքարեմ հանուն արդարադատության, ճնշում գործադրեմ Թրամփի վարչակազմի վրա, որպեսզի ի վերջո ճանաչվի Հայոց ցեղասպանությունը» – նշեց մոմավառության մասնակից Էդվին Փորթուգիլը:

Կանադայի «Թորոնթո Ռափթերզ» հայտնի բակսետբոլի թիմի մարզիչ Ռեքս Քալամյանը նույնպես ներկա էր մոմավառությանը:

«Հպարտ եմ, որ հայ եմ, որ ունեմ այդպիսի արմատներ: Մեր համայնքը շատ ամուր է, եւ այստեղ բազմաթիվ մարդիկ են փորձում հասնել Ցեղասպանության ճանաչմանը, ես էլ նրանց կողքին եմ», – “Ամերիկայի Ձայնին” տված հարցազրույցում ասաց Ռեքս Քալամյանը:

Մարիամ Մելքումյանը և Նարեկ Գրիգորյանը ընդգծեցին ԱՄՆ-ի կողմից Ցեղասպանության ճանաչումը՝ հաշվի առնելով Միացյալ Նահանգների կարևորությունն ու ազդեցությունը միջազգային ասպարեզում:

«Եթե ամերիկյան կառավարությունը ճանաչի, դա մեծ ճնշում կգործադրի Թուրքիայի կառավարության վրա, որը պարտավոր կլինի ինչ-որ չափով գնալ փոխզիջումների», – ասաց Նարեկ Գրիգորյանը:

Վաշինգտոնի Հայ դատի գրասենյակի գործադիր տնօրեն Արամ Համբարյանը կարևորեց, որ այսօրվա հավաքը խորհրդանշում է Միացյալ նահագների հայ համայնքի պահանջը իրենց իշխանությունից.

«Էրդողանն իր ուղին ընտրել է, նա շարունակելու է հերքել, սակայն, Ամերիկային անհրաժեշտ չէ աջակցել Էրդողանին, եւ մենք այսօր ասում ենք՝ Թուրքիան արժանի չէ, որպեսզի դրա համար արգելափակվի Հայոց ցեղասպանության ճանաչումը ԱՄՆ-ի կողմից»:

Անդրադառնալով Հայաստանի ներկայիս ներքաղաքական իրավիճակին՝ Արամ Համբարյանը հավելեց, որ ամերիկահայ համայնքի մշակույթի մի մասն է՝ պայքարել անարդարության դեմ.

«Երբ անարդարություն ենք տեսնում հայկական աշխարհի տարբեր մասերում, այդ թվում եւ Հայաստանի ներսում, ապա բողոքն առողջարար է: Մարդիկ շատ ճիշտ են, երբ բարձրաձայնում են սեփական կարծիքը իրենց, իրենց ընտանիքների, երկրի ու ժողովրդի համար կարեւորագույն հարցերի շուրջ: Դա ժողովրդավարության բնական մասն է»:

Իրավունքների հետ գալիս են նաեւ պարտականությունները, ուստի, բողոքները պետք է լինեն խաղաղ եւ օրինական, սակայն, բողոքն ինքնին պայքարի ընդունելի տեսակ է, ի վերջո, կարելի է հայտնել դիրքորոշումը քվեաթերթիկով, իսկ կարելի է՝ բողոքի տեսքով:

Ըստ տարիների ընթացքում ձևավորված ավանդույթի՝ ԱՄՆ-ի նախագահը յուրաքանչյուր տարի ապրիլի 24-ին հանդես է գալիս պաշտոնական հայտարարությամբ` հիշատակելով Առաջին աշխարհամարտի տարիներին Օսմանյան կայսրության հայերի զանգվածային կոտորածները:

Նշենք, որ ԱՄՆ-ի Կոնգրեսի հայկական հարցերով հանձնախմբի անդամները՝ազդեցիկ կոնգրեսականներ ու սենատորներ, արդեն նամակով դիմել են ԱՄՆ-ի նախագահին Դոնալդ Թրամփին՝ կոչ անելով ապրիլի 24ին հանդես գալ հայտարարությամբ և օգտագործել Ցեղասպանություն եզրը:

https://www.amerikayidzayn.com/a/4359622.html