Թուրքիայի կենտրոնական բանկն ԱՄՆ-ից դուրս է բերել իր ոսկու պաշարները

Թուրքիայի կենտրոնական բանկն ԱՄՆ դաշնային պահուստային համակարգից դուրս է բերել իր ոսկու պաշարները: Այդ մասին է վկայում բանկի տարեկան հաշվետվությունը, հաղորդում է «ՌԻԱ Նովոստի»-ն:

Փաստաթղթում նշվում է, որ 2016 թ. վերջին ԱՄՆ դաշնային պահուստային համակարգում պահվող Թուրքիայի կենտրոնական բանկի ոսկու պաշարը կազմել է 28 689 տոննա, մինչդեռ 2017 թ. վերջին համապատասխան տողում ոչինչ նշված չէ:

Հաղորդվում է, որ արտասահմանից իրենց ոսկու պաշարներն են դուրս բերել նաև խոշոր թուրքական մասնավոր բանկերը՝ արձագանքելով Թուրքիայի նախագահ Ռեջեփ Թայիփ Էրդողանի կոչին՝ «ազատվել փոխարժեքների ճնշումից և դոլարի դեմ օգտագործել ոսկի»: Թուրքական լրատվամիջոցների հաղորդմամբ՝ արտասահմանից երկիր է ընդհանուր առմամբ վերադարձվել 220 տոննա ոսկի:

Թուրքիայի և ԱՄՆ-ի միջև հարաբերությունները սրվել են Միացյալ Նահանգների կողմից Սիրիայի քրդերին տրամադրվող աջակցության ֆոնին:

http://www.tert.am/am/news/2018/04/20/gold/2667543