Բրիտանական հեղինակավոր The Guardian պարբերականն անդրադարձ է կատարել Թուրքիայում վաղաժամ նախագահական ու խորհրդարանական ընտրությունների անցկացման մասին հայտարարություններին:
Հայտնի պարբերականը, անդրադառնալով Թուրքիայի նախագահ Ռեջեփ Թայիփ Էրդողանին ու նրա վարած քաղաքականությանը, նշում է, որ նա պատկանում է ժամանակակից այն առաջնորդների թվին, որոնք տեսականորեն կարևորություն են տալիս ժողովրդավարական ընտրությունների անցկացմանը, սակայն երբ բանը հասնում է գործնականին՝ հրաժարվում են այդ նույն սկզբունքից՝ բացառելով ընտրություններում պարտվելու որևէ տարբերակ:
«Այս հարցում նա ոչ մի կերպ չի տարբերվում Ռուսաստանի նախագահ Վլադիմիր Պուտինից կամ Եգիպտոսի առաջնորդ Աբդուլ Ֆաթահ ալ Սիսիից: Ժողովրդավարության մասին նրանց պատկերացումը կարելի է այսպես բնութագրել. «Դուք քվեարկեք, բայց միևնույն է՝ ես եմ հաղթելու»,- գրում է պարբերականը:
Հոդվածագիրը շեշտում է, որ չնայած միջազգային հանրության աչքում իր համբավը կորցրած լինելուն՝ Էրդողանը 10 տարուց ավելի է՝ ղեկավարում է երկիրը: Միևնույն ժամանակ, պարբերականը նրան անվանում է «բևեռացնող» առաջնորդ:
Հոդվածի հեղինակը չի բացառել սպասվելիք ընտրություններում Էրդողանի կուսակցության անհաջողության մատնվելու սցենարը, սակայն ընդգծել է, որ դրա հավանականությունն իրականում շատ ցածր է:
Հիշեցնենք, որ նախօրեին Էրդողանը հայտարարել է երկրում արտահերթ նախագահական և խորհրդարանական ընտրությունների անցկացման անհրաժեշտության մասին: Թուրքիայի իշխող Արդարություն և զարգացում կուսակցության և նրա կոալիցիոն գործընկեր Ազգային շարժում կուսակցության մի շարք անդամների կողմից վաղաժամ ընտրության առաջարկն արդեն ուղղվել է երկրի խորհրդարան:
Leave a Reply