Թուրքիայի փոխվարչապետ և կառավարության խոսնակ Բեքիր Բոզդաղը հայտարարել է, որ Էգեյան ծովում Թուրքիայի և Հունաստանի միջև վիճելի տարածքներում կարող են ոչ ցանկալի և «անհամ» իրադարձություններ զարգանալ, գրում է DHA գործակալությունը:
«Հունական կողմը պետք է հրաժարվի իր սադրիչ գործողություններից, այլապես Էգեյան հատվածում կարող են մեզ համար էլ շատ անցանկալի, անհամ բաներ տեղի ունենալ: Ոչ ոք թող հույս չունենա, որ Թուրքիան աչք է փակելու եղածի վրա: Եթե հույները նման հաշվարկներ ունեն, այդ հաշվարկները հենց Էգեյան ծովում էլ կխեղդվեն, կգնան», – ասել է Բոզդաղը:
Հիշեցնենք, որ օրեր առաջ հույն զինծառայողները նախազգուշական կրակոցներ են արձակել օդ, երբ Հունաստանի Դոդեկանես արշիպելագի Կաստելորիզո կղզու մոտ գտնվող Ռո կղզյակի տարածքում նկատվել է թուրքական օդուժին պատկանող ուղղաթիռ, որը ցածր բարձրության վրա թռիչք է իրականացրել հունական կղզու տարածքի վրայով:
Ավելի ուշ Հունաստանի օդային սահմանը կրկին խախտած ինքնաթիռներին տարածքից դուրս բերելու գործողության ժամանակ կործանվել էր հունական ինքնաթիռ, օդաչուն զոհվել է։
Leave a Reply