Շվեյցարիայի թուրքերը բողոքի ակցիա են կազմակերպել` ընդդեմ Ժնևում Հայոց ցեղասպանության զոհերի հիշատակին բացվելիք հուշարձանի

Ժնևի թուրքական համայնքը բողոքի ցույց է կազմակերպել ընդդեմ քաղաքում Հայոց ցեղասպանության զոհերի հիշատակին ապրիլի 13-ին բացվելիք հուշարձանի, այս մասին հայտնում է Ստամբուլի հայկական պարբերականներից «ՀայԹերթ»-ը:

Հայտնի է, որ բողոքի ցույցին ներկա են եղել նաև թուրքական ազգայնական «Հայրենիք» կուսակցության փոխնախագահ Ալի Մերջանը, կուսակցության՝ Եվրոպայի ներկայացուցիչ Բեյհան Յըլդըրըմը, ինչպես նաև` Աթաթուրքի գաղափարների միության` Բեռնի և Ցյուրիխի տարածքային կազմակերպությունների ղեկավար Էթհեմ Քայալըն:

Ակցիայի կազմակերպիչները հայտնել են, որ իրենք հուշարձանի հարցով հանդիպել են Շվեյցարիայի խորհրդարանի՝ Ժնևից ընտրված պատգամավոր, հայտնի թուրքամետ գործիչ Իվ Նիդեգերի հետ:

Հայտնի է, որ հանդիպման ընթացքում թուրք գործիչները շեշտել են «Փերինչեքն ընդդեմ Շվեյցարիայի» գործով Մարդու իրավունքների եվրոպական դատարանի հայտնի վճռի մասին՝ պնդելով, որ այն, որպես խոսքի ազատության պաշտպանության օրինակ, կարող է կարևոր նախադեպ լինել նման դեպքերի համար:

Հենց բողոքի ակցիայի ժամանակ մասնակիցները բարձրացրել են «Բոլորս Փերինչեք ենք» գրությամբ պաստառներ:

Թուրք ազգայնականները նաև տեղեկացրել են, որ իրենք պատրաստվում են առավել ակտիվ աշխատանքներ ձեռնարկել տարբեր երկրների կողմից Հայոց ցեղասպանության ճանաչման որոշումները չեղարկելու, ցեղասպանության հերքումը քրեականացնելու վերաբերյալ օրենք ընդունած երկրներում այդ օրենքներից հրաժարվելու, կամ միայն Հոլոքոստի ժխտման դեպքում կիրառելու մասին շտկումներ մտցնելու ուղղությամբ:

Բացի այդ՝ պատրաստվում են աշխատանքներ տանել որևէ քաղաքում Հայոց ցեղասպանության զոհերի հիշատակին հուշարձան տեղադրել թույլ չտալու և ուսումնական ձեռնարկներից Հայոց ցեղասպանության մասին ծրագրերը հանելու ուղղությամբ:

http://www.tert.am/am/news/2018/04/12/genocide/2661229