Նիհաթ Օզդալ | Google-ից առաջ

Նիհաթ Օզդալը ժամանակակից թուրք գրականության ինքնատիպ գրողներից մեկն է:
Ծնվել է 1984 թ. Եփրատի ափին՝ Հալֆեթիում (Ուրֆա), որտեղ էլ ապրում և ստեղծագործում է մինչև օրս:
Ծագումով հայ բանաստեղծը 6 ժողովածուի հեղինակ է: Բանաստեղծությունները՝ թարգմանաբար և բնագիր, տպագրվել են թուրքական և արտասահմանյան մի շարք գրական պարբերականներում: 2010թ. լույս տեսած «Google-ից առաջ» (Google’den Önce) ժողովածուն արժանացել է հեղինակավոր Հոմերոս (2011) և Մեմեթ Ֆուաթ (2008 թ. դեռևս գրքի տպագրությունից առաջ) երիտասարդական բանաստեղծական մրցանակներին:

/1/
Փետրվարյան ճերմակի՝
առաջին իսկ կիրակի օրը,
գետը դափնուց հարցրեց:

/2/
Ալիքներն է կուլ տալիս
հավերժությունը,
անհետանալ է ուզում:

/3/
Թակարդի մեջ սպասող կաքավաքա՛ղ
մթնշաղին ընդառաջ՝
ո՜նց ես սարսափում խավարից:
Որսորդին կաղալու պարերն է սովորեցնում
կաքավը:

/4/
Հենց այնտեղ, ուր աղբյուրը գետին է փարվում,
դեպի այգաբաց լողալ է փորձում
մարդը:

/5/
Վերջին հատկին բաց թողեց սիմինդրը,
ու գնաց նա՝
իմն է, ասելով, աշխարհը համայն:

/6/
Ջուրը ձգեցի իղձերս բոլոր.
ի՞նչ իմանայի, որ
չի ազդելու ուժը դուրս հրող:

/7/
Սիրելն ավելի արագ սովորելու համար
պոկեց բոլոր երիցուկները:

/8/
Երանի՜ ամեն ծաղիկ
սերտի երջանիկ լինելու արվեստը:

/9/
Հրաժարվում է ջրից
մի հսկա ինքնասպան՝
Կետը:

/10/
Google,
կարո՞ղ ես արդյոք գտնել նրան,
ով երազիցս սահեց լռելյայն:

Թարգմանությունը թուրքերենից՝ Կարոլինա Սահակյանի

https://granish.org/google-ic-araj/