Հայկական լավաշը 100 տարի անց վերստին տարածվում է Դիարբեքիրում. թուրքալեզու քրդական պարբերականի անդրադարձը

Հայկական հացը` լավաշը, 100 տարի անց կրկին սկսել է թխվել Դիարբեքիրում: Դիարբեքիրցի հայերից Էրհան Յամանը հացի փուռ է բացել այստեղ` հայկական լավաշը վերստին Դիարբեքիրում տարածելու նպատակով: Այդ մասին, ըստ Akunq.net-ի, հաղորդում է «Ռուդավ» քրդական կայքէջի թուրքալեզու տարբերակը:

Աղբյուրի փոխանցմամբ` մինչ այժմ շինարարության ոլորտում աշխատած Էրհան Յամանը, Հայաստան այցելելուց հետո, որոշել է փուռ բացել Դիարբեքիրում` այստեղ հայկական լավաշի ավանդույթը վերականգնելու համար:

Էրհան Յամանը «Ռուդավի» հետ զրույցում մասնավորապես նշել է. «Լավաշը 100 տարի առաջ տարածված է եղել այստեղ: Երբ հայերը հեռացել են Դիարբեքիրից (Ցեղասպանության հետևանքով-Ակունքի խմբ.), այդ մշակույթն էլ են տարել իրենց հետ: Ես որոշեցի լավաշը դարձյալ տարածել Դիարբեքիրում: Եվ փա~ռք Աստծո, նորից փուռ բացեցի այստեղ»:

Յամանը շեշտելով, որ լավաշ հացատեսակը հայերին է պատկանում, նաև հայտնել է. «Ներկայում Թուրքիայի տարբեր շրջաններում, օրինակ` Ուրֆայում և Աղրըում (Արարատում-Ակունքի խմբ.) էլ են լավաշ թխում, սակայն հայկական լավաշն` իր համով և ավելի բարակ լինելով, մի փոքր տարբերվում է դրանցից»:

Յամանը հացի փուռն աշխատեցնում է Հայաստանից բերված հացթուխների միջոցով: Նրանցից մեկը` Ասյան, «Ռուդավի» հետ զրույցում ասել է. «Այս հացը շատ համեղ է, թեթև` ստամոքսի համար»:

Դիարբեքիրում գործող սույն հացի փռում օրեկան 600 լավաշ է թխվում: Էրհան Յամանը նախատեսում է 2 տարվա ընթացքում օրեկան թխվող լավաշների թիվը հասցնել 2 հազարի:

http://www.rudaw.net/mobile/turkish/kurdistan/060420182

Թարգմանեց Մելինե Անումյանը

Akunq.net