Վանի 400-ամյա Սուրբ Ստեփանոս եկեղեցին վերջնականապես անհետանալու եզրին է

Գանձախույզերի կողմից կողոպտման և ավիրման ենթարկվող` Վանի ներկայիս Մուրադիյե գավառում գտնվող պատմական Սուրբ Ստեփանոս հայկական եկեղեցու պատերը քանդված են, իսկ ներսում մեծ խորությամբ փոսեր են բացված: 1915 թ. Հայոց ցեղասպանությունից առաջ ակտիվ կերպով հայ համայնքին ծառայած սույն եկեղեցին նաև նշանավոր ուխտավայր է եղել: Եկեղեցին, չնայած այս բոլոր ավիրումներին, դեռ կանգուն է: Այդ մասին, ըստ Akunq.net-ի, հաղորդում է «Մեզոպոտամիա» լրատվական գործակալությունը:

Աղբյուրի համաձայն` հայկական միջնադարյան ճարտարապետության աննման նմուշներից մեկը եղող սույն եկեղեցու մոտակայքում գտնվող գերեզմանատան քարերը ևս ավիրվել են գանձագողերի կողմից, իսկ եկեղեցու այն հատվածները, որոնք կարողացել են դիմակայել այդ ավերածություններին, վերջնականապես քանդվելու սպառնալիքի տակ են:

Ժամանակին եկեղեցու մոտակայքում բնակություն հաստատած Էբուբեքիր Չիֆթչին հայտնելով, որ մինչև 1970 թ. կառույցը լիովին կանգուն է եղել, նաև հետևյալ տեղեկություններն է հաղորդում. «Եկեղեցու շրջակայքը և դռները կանգուն էին: Ես ինքս եմ տեսել քահանաների մենախցերը, որոնք ևս չէին ավիրվել: Մեր մարդիկ այս հարցում խիստ անզգա են: Մի քանի հոգի այս կառույցը պեղել է` գանձ գտնելու հույսով: Նման դեպքերը իրոք շատ ցավալի են. գանձախույզերը շատ վատ վիճակի են հասցրել եկեղեցին: Մենք ցանկանում ենք, որ պետությունը եկեղեցին վերականգնելով` վերադարձնի նրա նախկին տեսքը»:

Չիֆթչին նաև նշում է, թե չնայած ավիրումներին` եկեղեցին շարունակում է գրավել տեղացի և օտարերկրացի զբոսաշրջիկների ուշադրությունը:

http://gazetekarinca.com/2018/04/400-yillik-saint-stefanos-kilisesi-yikilmanin-esiginde/

Թարգմանեց Մելինե Անումյանը

Akunq.net