Թուրքիայի Դիարբեքիր քաղաքում բնակվող քուրդ ակտիվիստուհի և լրագրող Նուրջան Բայսալը թուրք-քրդական Ahval հանդեսում հրապարակել է ուշագրավ հոդված՝ «Թուրքիայի քրդերն ու հայերը՝ ինչպես թելն ու ասեղը» խորագրով, գրում է Rusarminfo.ru կայքը:
Հեղինակի խոսքով` Դիարբեքիրի բազմաթիվ վայրեր, որոնք կապ ունեն քաղաքի պատմության, դրա բնակիչների՝ հայերի և քրդերի հետ, համարյա ոչնչացվել են, ծածկվել թուրքական դրոշներով, հայկական Սուրբ Սարգիս եկեղեցի անհնար է մուտք գործել, իսկ բաց շուկաներում վաճառքի է հանվել այն ամենը, ինչ ժամանակին պատկանել է տեղի բնակիչներին:
«Ամեն ինչ հայտնվել է վաճառքում, այդ թվում՝ մեր պատմությունը: Ես հիշում եմ տատիկիս, որը մահացել է 104 տարեկանում: Նա Հայոց ցեղասպանության ականատես էր: Հիշում եմ՝ ինչպես էր նա երգեր երգում բոլոր հայ հարևանների համար:
Երբ նա երգում էր, նորից էր վերապրում այդ դեպքերը»,-գրում է հեղինակը:
Լրագրողը նկատում է, որ թուրքաբնակ քրդերի և հայերի ճակատագրերը մշտապես այնքան ամուր են միահյուսված եղել, որ ժողովուրդը նրանց հաճախ «թել ու ասեղ» էր անվանում:
Բայսալը կարծիք է հայտնել, որ երկու ազգերի համար եկել է հանուն սեփական պատմության փրկության ճակատագիրը փոխելու ժամանակը:
Leave a Reply