Թուրքիայի նախագահ Ռեջեփ Թայիփ Էրդողանը հայտարարել է, որ Թուրքիան «հակաահաբեկչական» գործողություն է սկսել Իրաքի Սինջար շրջանում, որտեղ ռազմական ներխուժում էր սպառնացել իրականացնել ավելի վաղ, հայտնում է Reuters գործակալությունը:
«Մենք ասացինք, որ կգնանք Սինջար: Այժմ գործողություններն այնտեղ սկսվել են»,- ասել է Էրդողանը Տրապիզոնում ունեցած ելույթի ժամանակ՝ առանց մանրամասնելու գործողության մասին:
Նա նշել է, որ իրենց նպատակն «ահաբեկչության» դեմ պայքարն է։
«Թուրքական պետականության պատմության մեջ երբեք չեն եղել օկուպացիայի և օտար հողերի գրավման փաստեր, ինչը չես ասի Արևմուտքի երկրների մասին»,- թուրքական լրատվամիջոցների փոխանցմամբ՝ ասել է Էրդողանը։
Իրաքի միացյալ հրամանատարությունը հերքել է, որ Իրաքի սահմանն օտար ուժեր են հատել, և հայտարարել է, որ շրջանն Իրաքի անվտանգության ուժերի հսկողության տակ է, և պատճառ չկա, որ զորքեր մտնեն այնտեղ:
Սինջարում գործակալության աղբյուրները հայտնել են, որ տարածքում անսովոր ռազմական ակտիվություն է նկատվել:
Էրդողանն անցած շաբաթ հայտարարել էր, որ «Քրդստանի աշխատավորական կուսակցություն» խմբավորումը նոր բազա է հիմնում Սինջարում, և թուրքական զորքերը կհարձակվեն անհրաժեշտության դեպքում:
Հյուսիսային Իրաքում աղբյուրները հայտարարել են, որ «Քրդստանի աշխատավորական կուսակցություն»-ը դուրս կգա Սինջարից:
Հիշեցնենք, որ Թուրքիայի զինուժը հունվարի 20-ին սիրիական Աֆրինում սկսել է քրդերի դեմ իրականացվող «Ձիթենու ճյուղ» ռազմարշավը: Միևնույն ժամանակ, թուրքական ուժերի հետ պայքարում են «Սիրիական ազատ բանակի» գրոհայինները: Դամասկոսը վճռականորեն դատապարտել է Թուրքիայի գործողություններն Աֆրինում՝ նշելով, որ այն Սիրիայի անբաժանելի մասն է:
Leave a Reply