Երուսաղեմի հայոց պատրիարքարանը պաշտոնապես հերքել է պատրիարքի մասին պոլսահայ «Ժամանակ» օրաթերթում հրապարակված լուրը

Ստորև թուրքերենից թարգմանաբար «Ակունքի» ընթերցողներին ենք ներկայացնում Երուսաղեմի հայոց պատրիարքարանի պաշտոնական հայտարարությունը և հերքումը` պոլսահայ «Ժամանակ» օրաթերթում հրապարակված լուրի վերաբերյալ.

«Ձեր թերթի` 2018 թ. մարտի 6-ի թիվ 11586-ի առաջին և չորրորդ էջերում «Ստամբուլյան մի հեքիաթ» վերնագրով հրատարակված լուրը ճշմարտությունը չի արտացոլում և հարձակման բնույթ է կրում պաշտպանյալ հանդիսացող Նորին սրբություն պատրիարքի հանդեպ: Մեր կողմը չի ըմբռնում, թե լրիվ զրպարտանք եղող այդ լուրի հրապարակումը ի՞նչ նպատակի է ծառայում: Նորին սրբություն պատրիարքի տարած աշխատանքների դեմ ուղղված այդ արտահայտությունները, որոնք լիովին սահմանափակում են խոսքի ազատությունը և զրպարտանքի բնույթ են կրում, խախտում են մամլո էթիկան և սկզբունքները:

Քանզի`

Մարյաքոփ վաքըֆը մի հիմնադրամ է, որը գործում է Իսրայելում, նրա կենտրոնը գտնվում է Երուսաղեմում, և այն ղեկավարվում է Երուսաղեմի հայոց պատրիարքարանի կողմից: Մարյաքոփ վաքըֆը Թուրքիայի սահմաններում շուրջ 100 անշարժ գույք ունի, որոնց մեծ մասը անօրինական հաշվառման միջոցով վաճառվել է երրորդ անձանց, դրանք սեփականատերերին են անցել` առանց փոխհատուցում վճարվելու կամ օգտագործվել են ապօրինի կերպով:

Բացի այդ՝ Վաքըֆների գլխավոր տնօրինությունը Մարյաքոփ հիմնադրամը, 18.07.1973 ամսաթվին ընդունված թիվ 370 և թիվ 369 որոշումների համաձայն, ընդգրկել է գրանցված վաքըֆների շարքում: Նորին սրբություն պատրիարքի պահանջով համապատասխան վարչական որոշման չեղարկման համար դիմել ենք Անկարայի 15-րդ վարչական դատարան: Վերջինս վճռելով, թե տվյալ վարչական որոշման մեջ հիշատակվող վաքըֆը և Մարյաքոփ վաքըֆը նույն հիմնադրամը չեն, մերժել է մեր դատական հայցը` այն իրավասությունից դուրս համարելով: Դրանից հետո մենք դիմել ենք վճռաբեկ դատարան` այդ որոշումը վերանայելու մեր պահանջն ուսումնասիրելու նպատակով: Այն քննած Թուրքիայի պետական խորհրդի 10-րդ շրջանի տեղական դատարանը վերահաստատել է այդ որոշումը: Վերջին փուլում, երբ բոլոր ուղիներն սպառվել են, անհատապես դիմել ենք Սահմանադրական դատարան: Մեր դիմումի մեջ հաղորդել ենք, որ Մարյաքոփ վաքըֆը և դատական հայցում հիշատակվող հիմնադրամը նույն վաքըֆն են: Դատական գործընթացը ներկայում շարունակվում է: Սույն դատական հայցը և դրան ենթակա այլ դատական գործեր կապված են 100-ից ավելի անշարժ գույքերի հետ, որոնց վիճակին հետևում ենք տարբեր իրավական գործընթացների միջոցով: Հետևաբար խոսքը չի գնում միայն մեկ դատական գործի մասին: Միաժամանակ շարունակվում են նաև գույքերի վերաբերյալ մեր ուսումնասիրությունները: Դատական գործընթացը բարդանում է նաև այն պատճառով, որ սեփականության մասին վկայագրերը օսմաներեն լեզվով են: Այդ նպատակով բազմաթիվ հանգամանքների մասին խորհրդակցելու անհրաժեշտություն կա:

Նորին սրբություն պատրիարքը գաղտնի օրագիր չի պահում, ինչպես դա նշվել էր լուրում: Նորին սրբություն պատրիարքի` Ստամբուլ այցելությունը միայն մի նպատակ ունի: Նորին սրբություն պատրիարքը և Երուսաղեմի պատրիարքարանի անշարժ գույքի ղեկավարման պատասխանատու Պարետ Երեցյանը մի այց են կազմակերպել Ստամբուլ` վերոնշյալ իրավական գործընթացի վերաբերյալ տեղեկություններ ստանալու, վերջին դրության մասին խորհրդակցելու և գործընթացը շարունակելու համար ճանապարհային քարտեզ գծելու նպատակով: Որևէ անձի ներգրավված իրավական գործընթացի կապակցությամբ խորհրդակցական շփումներ ունենալու համար դեպի տվյալ քաղաք այցի` մեկ ուրիշի կողմից կազմակերպումը խորհրդավոր բնույթ չի կրում: Նորին սրբություն պատրիարքի այդ այցի ընթացքում նրա հետ երկու անգամ ժողով ենք արել: Բացի այդ՝ նրան փաստաթղթերի և հայտարարությունների թարգմանություններ են տրամադվել` դատական հայցերի բովանդակության վերաբերյալ: Նրա` այստեղ գտնվելու ընթացքում շարունակաբար կապի մեջ ենք գտնվել իր հետ:

Լուրի մեջ նշված այն հավանականությունը, թե մեր վաքըֆի գույքը վաճառվել է Նորին սրբություն պատրիարքի կողմից, հեռու է իրականությունից` որևէ կոնկրետ տեղեկության կամ փաստաթղթի վրա չհիմնվելու պատճառով: Բացի այդ՝ տվյալ ենթադրությունը հանցանքի վերագրում է նշանակում: Որևէ դատական գործ չկա, որ այսօր ավարտված լինի, չկա նաև որևէ գույք, որի սեփականության վկայականը և որի համար մի ղուրուշ դրամ ստացված լինեն: Հետևաբար այն պնդումները, թե հիմնադրամի գույքերը նրան են անցնում, զրպարտանքից բացի այլ բան չեն ներկայացնում: Քանի որ Վաքըֆների խորհրդի ընդունած` գրանցման մասին որոշումը ներկայում ընթացքի մեջ է, Երուսաղեմի պատրիարքությունը չի կարող Մարյաքոփ վաքըֆի գույքերը գործածելու որևէ իրավունք ունենալ: Հետևաբար բանականությունից դուրս է Նորին սրբություն պատրիարքի կողմից վաքըֆի գույքը վաճառելու մասին ենթադրությունը: Մանավանդ որ Նորին սրբություն պատրիարքը նման նպատակ էլ չունի: Նորին սրբություն պատրիարքը ձգտում է տեր կանգնել իր շարունակությանը, իր հիմնադրամին և վաքֆային գույքերին, մի բան, որ բխում է իր պաշտոնից ու պատասխանատվությունից: Քանի որ Նորին սրբություն պատրիարքը լիովին վստահում է Թուրքիայի Հանրապետության իրավական համակարգին և արդարադատության մասին ընկալումին, համոզված է, որ իրավական գործընթացի արդյունքում կվերադարձվի իր սեփականության իրավունքը: Նորին սրբություն պատրիարքը կարող է իր ցանկացած ժամանակ Ստամբուլ այցելել` ընթացքի մեջ գտնվող իրավական գործընթացի վերաբերյալ խորհրդակցություններ ունենալու նպատակով: Այդ հագամանքը, անկասկած, պատրիարքի ամենաբնական իրավունքն է:

Լրագրողական գործունեության հետ անհամատեղելի է Նորին սրբություն պատրիարքի` Ստամբուլ այցի ժամանակ նրա մնացած հյուրանոցի և վաքըֆի մի ղեկավարի անձնական ավտոմեքենան օգտագործելու նպատակների մասին ենթադրություններ անելը: Այն պնդումը, թե Նորին սրբություն պատրիարքը մնացել է Բոսֆորի նեղուցի ափին գտնվող մի հյուրանոցում, որպեսզի «Մի ստամբուլյան հեքիաթի» պահերն ապրի, և որ Ստամբուլը վայելելու նպատակ է ունեցել, ինչպես նաև` այդ ենթադրության առաջացրած ասոցիացիաները ոչ այլ ինչ են, քան ոչ սազական հարձակումներ` Նորին սրբություն պատրիարքի անձնական իրավունքների հանդեպ:

Նորին սրբություն պատրիարք Նուրհան Առաջինը համայն հայության` աշխարհում գտնվող 4 հոգևոր կենտրոններից մեկը հանդիսացող Երուսաղեմի հայոց պատրիարքության ներկայացուցիչն է: Նման ոճի անհիմն, անարդար և աճպարարական նպատակներ հետապնդող հրապարակումներն ուժասպառ են անում Նորին սրբություն պատրիարքին, Թուրքիայի հայկական համայնքին և համայն աշխարհի հայության շրջանում բացասական ընկալում հարուցում Նորին սրբություն պատրիարքի և Երուսաղեմի հայոց պատրիարքության վերաբերյալ: Մամուլը պարտավոր է հասարակայնությանը ներկայացնել իրականությանը համապատասխանող փաստեր և ուսումնասիրել դեպքի ճշմարտացիությունը: Անիրական լուրերը չեն համապատասխանում մամլո օրգանների պարտականությունների հետ և, անկասկած, կարող են ոտնահարել տվյալ անձի իրավունքները

Երուսաղեմի հայոց պատրիարքի փաստաբան Ալի Էլբեյօղլու»:

Թարգմանեց Մելինե Անումյանը

Akunq.net