Միացեալ Նահանգներ մեծ քանակութեամբ զէնք մատակարարած են Սուրիոյ տարածքին գտնուող «ահաբեկչական խմբաւորումներուն»: «Հապերթիւրք» կը նշէ, որ այս մասին երէկ Անգարայի մէջ իր արտասանած խօսքին ընթացքին յայտարարած է Թուրքիոյ նախագահ Ռեճեփ Թայիփ Էրտողան:
«Եթէ մենք ռազմավարական գործընկեր ենք, ապա դուք (Միացեալ Նահանգները, «Ա.») պէտք է մեզ յարգէք եւ մեզ խաբելէ դադրիք», ըսած է ան:
«Դուք Սուրիա ուղարկած էք զէնքով լեցուն 5000 բեռնատարներ եւ ռազմամթերքով լեցուն 2000 բեռնարկղներ: Կը նշանակէ, թէ մեր դիմումին բացասական պատասխան տուած էք, սակայն ահաբեկչական խմբաւորումները զինած էք: Ի՞նչ գործընկերութեան մասին կրնաք խօսիլ», աւելցուցած է Էրտողան:
Ան նախապէս յայտնած էր, թէ Թուրքիա Միացեալ Նահանգներուն դիմած է զէնք-զինամթերք ստանալու համար, սակայն Ուաշինկթըն մերժած է զանոնք տրամադրել եւ փոխարէնը զէնք մատակարարած է քրտական Ժողովուրդի պաշտպանութեան ջոկատներուն:
Թուրքիոյ նախագահը ըսած է, որ ներկայիս «բոլոր այդ զէնքերը կ՛անցնին թրքական բանակի ձեռքը»:
«Մենք կը գտնենք փապուղիներ, որոնց մէջ կան զէնքի պահեստներ, կը գտնենք տուներ, որոնք լեցուած են զինամթերքով», ըսած է ան:
Թուրքիոյ արտաքին գործոց նախարար Մեւլութ Չաւուշօղլու երէկ յայտարարեց. «Ամերիկացիներէն Մընպեժէն հեռանալ չպահանջեցինք, այլ` քրտական միլիսները հեռացնել այդտեղէն»:
Leave a Reply