ՄԱԿ-ը հայտարարել է Թուրքիայում մարդու իրավունքների զանգվածային խախտումների մասին

Թուրքիայում արտակարգ դրության ռեժիմի գործողության շարունակումը հանգեցրել է մարդու իրավունքների զանգվածային խախտումների, իսկ հրապարակվող դեկրետների բնույթը մատնանշում է իշխանության հնարավոր չարաշահումը երկրում անցանկալի տեսակետներն արմատախիլ անելու նպատակով, ասված է ՄԱԿ–ի մարդու իրավունքների գերագույն հանձնակատարի գրասենյակի զեկույցում, որը հրապարակվել է այսօր, փոխանցում է РИА Новости-ն:

Փաստաթուղթը պատրաստվել է 2017 թ. հունվարի 1-ից մինչև դեկտեմբերի 31-ն ընկած ժամանակաշրջանում երկրի իրադրության վերլուծության հիման վրա: Տեքստում նշվում է, որ արտակարգ դրության ռեժիմի գործողության՝ սովորական դարձած երկարաձգումները հանգեցրել են մարդու իրավունքների լուրջ խախտումների: Խոսքը, մասնավորապես, վերաբերում է աշխատանքի, ազատ տեղաշարժվելու իրավունքից ապօրինաբար զրկելուն, նաև` կտտանքներին, վատ վարվեցողությանը, կամայական ձերբակալություններին, ժողովների և կարծիքների արտահայտման ազատության իրավունքի սահմանափակմանը: Արտակարգ դրության ռեժիմի գործողության շարունակումը կարող է երկարաժամկետ ազդեցություն ունենալ պետության սոցիալ-տնտեսական և ինստիտուցիոնալ դրության վրա:

Փորձագետներն ընդունում են, որ 2016 թ. հուլիսի 15-ի զինվորական հեղաշրջման փորձից հետո մեծ խնդիրներ են ծառացել Թուրքիայի առջև, սակայն «դեկրետների թվաքանակը, թողարկման հաճախականությունը և ազգային անվտանգության սպառնալիքների հետ կապերի բացակայությունը մատնանշում են, որ արտակարգ դրության ընթացքում գործի դրված ուժերն օգտագործվում են կառավարության քննադատության կամ նրա հետ անհամաձայնության բոլոր ձևերը ճնշելու համար:

https://www.aysor.am/am/news/2018/03/20/%D5%84%D4%B1%D4%BF-%D4%B9%D5%B8%D6%82%D6%80%D6%84%D5%AB%D5%A1/1388637