Հայաստանի նկատմամբ Թուրքիայի դիրքորոշումը հակասում է ԱՄՆ ու ԵՄ քաղաքականությանը Հարավային Կովկասում. թուրքագետ

Հայ-թուրքական արձանագրությունները առոչինչ հայտարարելով՝ երկկողմ հարաբերություններն ավելի վատ չեն լինի, քան ներկայումս, որովհետև հարաբերություններ որպես այդպիսին չկան:

Tert.am-ի հետ զրույցում այս մասին ասաց թուրքագետ Հակոբ Չաքրյանը՝ խոսելով պաշտոնական Անկարայից հնչեցված տեսակետին, թե իրենց համար տխուր էր, որ Հայաստանն առոչինչ հայտարարեց հայ-թուրքական արձանագրությունները:

«Իրենց գործն է, մենք առաջին հերթին ուզում ենք, որ հայերը դուրս բերեն զորքերը ադրբեջանական հողերից, սա էր մեր առանցքային պահանջը, սակայն հայերը չցանկացան դրան գնալ»,- APA-ի փոխանցմամբ՝ ասել է Թուրքիայի արտաքին գործերի փոխնախարարը:

Հակոբ Չաքրյանը նշեց, որ թեև Թուրքիան շարունակում է պնդել Ղարաբաղի հարցում ունեցած իր նախապայմանների մասին, միջազգային հանրությունը դժվար թե դրան արձագանքի: «Միջազգային հանրությունը զբաղված է այլ իրադարձություններով: Թուրքիան հստակ հայտարարում է, որ Հայաստանի հետ հարաբերությունները պայմանավորում է Ղարաբաղով, բայց չեմ կարծում, թե դրան արձագանքել է պետք»,- նշեց Հակոբ Չաքրյանը:

Հայ-թուրքական արձանագրություններն առոչինչ հայտարարելով՝ երկկողմ հարաբերությունները ավելի վատ չեն լինի, քան ներկայումս, որովհետև հարաբերություններ, ըստ թուրքագետի, չկան:

«Մեծ տերությունները խանդոտ են, Թուրքիայի ցանկացած հարց Ղարաբաղի հարցում ԱՄՆ-ի, Ֆրանսիայի, Ռուսաստանի կողմից կդիտվեն որպես ոտնձգություն: Ցանկացած քայլ Ղարաբաղի հարցում նրանք կսաստեն: Թուրքիայի հետ մեր հարաբերությունները չեն լինի ավելի վատ, քան հիմա: Նախապայմաններ են առաջարկում՝ Ղարաբաղի, Հայոց ցեղասպանության մասին: Դրանցից ոչ մեկը մենք չենք կարող բավարարել: Դրանք միշտ եղել են ու միշտ լինելու են ուժի մեջ:

1991թ.-ից կառավարություններ են փոխվել, բայց Թուրքիայի որդեգրած դիրքորոշումը ՀՀ-ի նկատմամբ մնացել է նույնը: Շուրջ 27 տարի է՝ մենք այս իրավիճակում ենք և կարծես սովոր ենք ապրել առանց Թուրքիայի»,- նշեց թուրքագետը:

Հակոբ Չաքրյանն ասաց, որ հայ-թուրքական արձանագրությունների վավերացումն ավելի ձեռնտու էր Թուրքիային, քան Հայաստանին:

«Այս փաստաթղթի առոչինչ հայտարարումը ոչ այնքան Հայաստանին է վնաս, որքան Թուրքիային: Իրենք պետք է շահագրգիռ լինեին, որ Հայաստանի հետ դիվանագիտական հարաբերություններ հաստատվեին, որովհետև Հայաստանի նկատմամբ իրենց դիրքորոշումը խոչընդոտ է դառնում, հակասում է ԱՄՆ ու Եվրամիության քաղաքականությանը Հարավային Կովկասում»,- շեշտեց Հակոբ Չաքրյանը:

http://www.tert.am/am/news/2018/03/18/Hakob-chaqryan/2640874