Միլիոնավոր մարդիկ տեսան Հրանտին գետնին պառկած և ասացին՝ «Ես նրա պես մեկն եմ, նա մեր պես մեկն է». Դինքի գործով մեղադրյալ

Ստամբուլում նախօրեին կայացել է պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով հերթական դատական նիստը:

Ինչպես գրում է «Ակօս»-ը, դատական լսումների ժամանակ պաշտպանական ճառով հանդես է եկել Ստամբուլի Ժանդարմերիայի նախկին պաշտոնյա Մուհարրեմ Դեմիրքալեն, որը չի ընդունել իրեն առաջադրված մեղադրանքը, այն է՝ տեղեկություն ստանալով Դինքի սպանության նախապատրաստման մասին՝ դիտավորությամբ որևէ կանխարգելիչ քայլ չձեռնարկել:

Դեմիրքալեն պնդել է, որ ինքն ու իր բաժնի աշխատակիցները որևէ կապ չունեն իրականացված սպանության հետ, ու նրանց անունն այս դատական գործում օգտագործվում է որոշ ուժերի կողմից, որոնք ցանկանում են շեղել դատական գործի ընթացքը:

Թուրք նախկին պաշտոնյան նաև հատուկ խոսքով դիմել է Դինքի ընտանիքին:

«Հարգելի սգավոր ընտանիք, ուզում եմ երդվել ինձ համար սրբազան բոլոր արժեքներով, որ ես ու իմ աշխատակազմը ոչ մի կապ չունենք այս դատական գործի հետ:

Մեզ ցանկանում են օգտագործել այս դատավարության մեջ: Դուք գիտեք, որ այս հողերում մարդկանց արժեքը գիտակցում են նրանց մահից հետո: Միլիոնավոր մարդիկ տեսան Հրանտին գետնին պառկած և ասացին՝ «Ես նրա պես մեկն եմ, նա մեր պես մեկն է»: Այս ամենը նրան հետ չի բերի, սակայն որքան էլ ցավալի լինի՝ որոշ մարդկանց մահն անգամ մարդկությանը մեծ ծառայություն է մատուցում», – ասել է Մուհարրեմ Դեմիրքալեն:

Հրանտ Դինքը սպանվել է 2007-ի հունվարի 19-ին Ստամբուլում:

http://www.tert.am/am/news/2018/03/14/dink/2637149