Ով չի տեսել Անին, չի տեսել աշխարհը. զբոսաշրջիկները սիրում են հինավուրց քաղաքը

Քաղաքակրթության բնօրրան համարվող Անին դարերի ընթացքում տարբեր տոհմերի սերնդափոխություն է տեսել։ Անին տեսնելու ցանկություն ունեցողների թիվն ավելի ու ավելի է մեծանում հատկապես այն բանից հետո, երբ այն ներառվեց ՅՈՒՆԵՍԿՕ–ի համաշխարհային մշակութային ժառանգության ցանկում։
Հայ-թուրքական սահմանին` Կարսում (Արևմտյան Հայաստան, այժմ Թուրքիայի տարածք — խմբ.) գտնվող Անին 961-1045 թվականներին կառավարել են Բագրատունիները, գրում է Dailysabah թուրքական պարբերականը։
«Հնագույն քաղաքը, որտեղ XI-XII դարերին նաև իսլամական հուշարձաններ են հայտնվել, 2016 թվականին ներառվել է ՅՈՒՆԵՍԿՕ-ի համաշխարհային ժառանգության ցանկում», — գրված է հոդվածում։
Կարսի թանգարանի տնօրեն Նեջմեթին Ալպը պատմել է, որ քաղաքն առավել հայտնի է դարձել պատվավոր ցանկում ընդգրկվելուց հետո։
Պարբերականը ներկայացրել է նաև քաղաքի գեղեցկությամբ հիացած զբոսաշրջիկների մեկնաբանությունները։

Անին հայտնի է որպես «հազար ու մի եկեղեցիների քաղաք»։ Միջնադարում այստեղով էին անցնում բազմաթիվ առևտրական ճանապարհներ։ Քաղաքում կային բազմաթիվ պալատներ ու հասարակական կառույցներ։ 961-ից 1045 թվականներին Անիի թագավորության մայրաքաղաքն էր, որի սահմաններն ընդգրկում էին ժամանակակից Հայաստանի զգալի մասն ու Թուրքիայի արևելքը։
Անի քաղաքի հարավային եզրին կանգնած է վեհաշուք Մայր տաճարը՝ Սուրբ Աստվածածին եկեղեցին: Այն համարվում է Անիի եկեղեցիների թագուհին, իսկ որոշ մասնագետներ այն համարել են Կովկասի ճարտարապետության զարդը։ Կառուցվել է 989-1001 թվականներին, Տրդատ ճարտարապետի նախագծով։ Այսօր պահպանվել են բացառիկ շինության ավերակները։

https://armeniasputnik.am/society/20180315/10914070/ani-zbosashrjik.html