Նախագահ Էրդողանը Թուրքիան վերածում է մռայլ բանտի. Washington Post

Ամերիկյան «Washington Post» թերթը գլխավոր նյութով անդրադարձել է Թուրքիային ու Էրդողանի ստեղծած ռեժիմին։ Թերթը հիշեցնում է, որ 23 թուրք լրագրողներ «Twitter»-ում կատարած հրապարակումների պատճառով մեղադրվել են տարբեր ահաբեկչական խմբավորումների հարելու, դրանց  անդամներ լինելու մեջ ու դատապարտվել են 2-7 տարվա ազատազրկումների։ Ըստ հրապարակման, 2016թ․ հուլիսի 15-ի հեղաշրջման փորձից հետո Էրդողանն իսկական ճնշումների արշավ էր սկսել մամուլում, կառավարությունում, գիտության եւ անվտանգության ոլորտներում աշխատող բոլոր այն անձանց դեմ, որոնց ընկալում էր որպես թշնամիներ։ Դրա հետևանքով 60․000 մարդ ազատազրկվեց, ևս 150․000-ը զրկվեց աշխատանքից, այդ ճնշումները արդի ու շարունակակն են մինչ օրս:

«Թուրքիայի նախագահ Ռեջեփ Թայիփ Էրդողանի իշխանության ներքո մեկ tweet-ը, գրառումը, խոսքն ու հայացքը վերածվում է հանցանքի, իսկ ժողովրդավարությունը՝ բռնապետության։ Երկիրը, որ դանդաղ, բայց հաստատակամորեն դառնում էր չափավորության օրինակ, Թայիփ Էրդողանի կողմից վերածվում է համատարած մռայլ բանտի»,-գրում է թերթը։

Թերթը գրում է, որ Էրդողանի գլխավոր նպատակն ԱՄՆ-ում բնակվող Ֆեթուլլահ Գյուլենի բանտարկությունն է՝ որպես իշխանափոխության ու ընդվզման սադրիչի, որը, սակայն, չի ընդունում իրեն ուղղված մեղադրանքները. «Թուրքիայում ընթացող դատավարությունները ցույց են տալիս, թե որքան է հեռացել այս երկիրը ժողովրդավարությունից, մարդու իրավունքներից եւ իրավունքի գերակա սկզբունքից։ Էրդողանի բռնապետությունը պետք է կոչվի իր անունով։ Որքան էլ որ նա փակում է իր ականջները, ԱՄՆ-ն եւ աշխարհի մյուս երկրները պետք է լսելի դարձնեն իրենց բողոքը»,-գրում է «Washington Post»-ը։

http://armtimes.com/hy/article/133306