ԱՆԳԱՐԱ, «Անատոլու».- Թուրքիոյ արտաքին գործոց նախարարութիւնը արձագանգած է Գերմանիոյ մէջ թրքական երկու մզկիթի դէմ յարձակումի դէպքին եւ Գերմանիոյ իշխանութիւններուն կոչ ուղղած՝ նման միջադէպերու կրկնութիւնը կանխարգիլելու համար քայլերու ձեռնարկելու: Այս մասին կը հաղորդէ թրքական «Թէ.Ռէ.Թէ.» պատկերասփիւռի կայանը:
Պերլինի երկու տարբեր շրջաններու մէջ թրքական մզկիթներու դէմ միաժամանակ կատարուած յարձակումներու պատասխանատուութիւնը ստանձնած է Քիւրտիստանի բանուորական կուսակցութիւնը:
«Վերջերս մտահոգութեամբ կը հետեւինք Գերմանիոյ մէջ հակաիսլամ եւ ազգայնամոլ շրջանակներու, ինչպէս նաեւ Քիւրտիստանի բանուորական կուսակցութեան կողմէ մզկիթներու վրայ յարձակումներու աճին: Քրտական կուսակցութեան կողմէ յարձակման պատասխանատուութիւնը ստանձնելը անգամ մը եւս ջուրի երես հանած է այդ խմբաւորման իսկական դէմքը: Մխիթարող միակ հանգամանքը՝ միջադէպին ընթացքին զոհեր չարձանագրուիլն է», ըսուած է հրապարակուած յայտարարութեան մէջ:
Թուրքիոյ արտաքին գործոց նախարարութիւնը Գերմանիոյ կոչ ուղղած է յստակ քայլեր որդեգրելու՝ նման միջադէպերու կրկնութիւնը բացառելու, յարձակումին մեղաւորները գտնելու եւ զանոնք պատժելու համար:
Asbarez.com
Leave a Reply