Հերքվել է լուրը, թե Էրդողանը հրաժարվել է նստել հասարակ աթոռի վրա Պապի հետ հանդիպմանը

Թուրքական մի շարք կայքերում և սոցցանցերում տեղեկություն էր տարածվել, որ Թուրքիայի նախագահ Ռեջեփ Թայիփ Էրդողանի և Հռոմի պապ Ֆրանցիսկոսի հանդիպման ժամանակ ուշագրավ միջադեպ է գրանցվել: Ըստ այդ շրջանառվող լուրերի, երբ կողմերը հանդիպել են Հռոմի պապի գրասենյակում, աշխատակիցները Թուրքիայի նախագահին առաջարկել են մի աթոռ (նկարում՝ կարմիր շրջանակով), որը տարբերվում էր Ֆրանցիսկոս պապի համար նախատեսված աթոռից: Էրդողանը, հրաժարվելով իրեն առաջարկած աթոռից, պահանջել է, որ իր համար բերեն այլ աթոռ, որը նույնքան հարմարավետ է, որքան Հռոմի պապինը: Վերոնշյալ լուսանկարը «Facebook»-ի 20 հազար օգտատեր հավանել է, իսկ 5 հազարը՝ կիսվել այդ լուսանկարով:

Բայց թուրքական «Haberler» լրատվակայքը, «Ihlas» լրատվական գործակալությունը, հանդիպմանը ներկա գտնված լրագրողներին վկայակոչելով, հերքել են վերոնշյալ տեղեկությունը և պարզաբանել, որ նկարում կարմիր շրջանակի մեջ առնված աթոռը ընդամենը նախատեսված է եղել թարգմանչի համար: Իսկ Էրդողանը բազմել է նույն այն աթոռին, որը նախկինում առաջարկվել է Հռոմի պապի հյուրերին:

Հիշեցնենք, որ դա 59 տարվա ընթացքում Թուրքիայի նախագահի մակարդակով Վատիկան կատարված առաջին այցն է, որն արդեն մամուլում «պատմական» է որակվել:

Ermenihaber.am