Ըստ Աբդուլ Համիդի թոռան՝ Էրդողանն էլ իր պապի պես միայնակ է ու թշնամիներով շրջապատված

Օսմանյան կայսրության 34-րդ սուլթան Աբդուլ Համիդի թոռներից Օրհան Օսմանօղլուն համեմատել է Թուրքիայի նախագահ Ռեջեփ Թայիփ Էրդողանին իր պապի հետ՝ նշելով, որ այն ամենը, ինչ այժմ վերապրում է Էրդողանը, շատ նման է իր պապի կյանքում պատահած իրադարձություններին:

Ինչպես գրում է թուրքական Diken.com.tr կայքը, Աբդուլ Համիդի թոռը նշել է, որ իր պապը շատ միայնակ մարդ է եղել, քանի որ շատ թշնամիներ է ունեցել, և որ նրա շրջապատը նրան չէր հասկանում ու տեր չկանգնեց նրան:

«Այսօր Էրդողանը նույն կռիվն է տալիս, պետք է շատ զգույշ լինել և չկրկնել նույն սխալները», – ասել է Օսմանօղլուն:

Նա հայտարարել է, որ Էրդողանն անցած 15 տարիների ընթացքում կարողացել է Թուրքիայում վերականգնել պատմական այն արժեքները, որոնք մինչ այդ մոռացության էին մատնվել:

«Երբ առաջին անգամ Թուրքիա եկա՝ 13 տարեկան էի: Ցանկացա գնալ պապիս գերեզման: Գնացի Չեմբերլիթաշ, այնտեղից ինձ անցկացրին գերեզմանի մոտ: Բղավեցի «Պապի՛կս»: Ինձ ասացին՝ «Լռի՛ր, այդ ինչ ես անում: Մենք նրան որպես Կարմիր սուլթան ենք հիշատակում»։ Ո՞ւր էինք հասել… Այսօր արդեն Աբդուլ Համիդի անունով դպրոցներ են կոչվում, նրա անունով միություն ենք հիմնում», – ասել է սուլթանի թոռը:

Հիշեցնենք, որ Աբդուլ Համիդը հայտնի է նաև «Կարմիր սուլթան» մականունով, որը ստացել է հայկական արյունալի ջարդերը կազմակերպելու համար։

http://www.tert.am/am/news/2018/02/06/osmanoglu/2607426