«Բոլորն էլ հայերից են սովորել այս արհեստը». Թուրքիայում երկաթագործության հայկական ավանդույթները պահպանող վերջին սերունդը. թուրքական կայքի անդրադարձը

Թուրքական Guneydoguguncel.com կայքն անդրադարձել է Թուրքիայի Դիարբեքիր քաղաքում տարածքի հին արհեստներից երկաթագործության ավանդույթների վերջին կրողներին ու նրանց հռչակավոր ուսուցիչներին, որոնք բոլորն էլ, ինչպես պարզվել է, հայ են եղել:
«Դիարբեքիրում ապրող և այս տարածքում արհեստագործության հայրերը համարվող հայերի թիվը թեև այստեղ օր օրի նվազում է, սակայն նրանց աշակերտները, որոնք շարունակում են արհեստագործական հայկական ավանդույթները, հանդիսանում են երկաթագործության արհեստի վերջին ներկայացուցիչներն այստեղ», – գրում է հեղինակը՝ շեշտելով, որ հայ վարպետների քուրդ աշակերտները նույնպես հույս չունեն, թե արհեստը երկար կյանք կունենա այստեղ:
Որպես դրա հիմնական պատճառ` նշում են Թուրքիայում չդադարող ակտիվ ուրբանիզացիոն գործընթացն ու կյանքի «ավտոմատացումը»:
Դիարբեքիրում որպես «Երկաթագործների շուկա» հայտնի տարածքում աշխատող նշանավոր երկաթագործ Թարըք Սևիմն այսպես է պատմում իր՝ այս արհեստը սովորելու պատմությունը։
«Ես այս արհեստը սովորել եմ մեծ եղբորիցս, եղբայրս էլ Խեչո վարպետից, նա հայ է և արվեստի հայտնի գործիչ Բեդրի Այսելիի քեռին: Խեչո ուստան արտագաղթեց Եվրոպա, այնտեղ էլ մահացավ, այս շուկայում ով կա, բոլորը հայերից են սովորել այս արհեստը», – ասել է Սևիմը, ով համոզված է, որ իրենցից հետո այս արհեստը շարունակողներ այլևս չեն լինի, քանի որ ներկայում երիտասարդները չեն հետաքրքրվում այս ամենով:

http://www.tert.am/am/news/2018/02/05/diyarbakir/2606441