Դավութօղլուի նախկին խորհրդական Էթյեն Մահչուփյանը քննադատության է ենթարկել Թուրքիայի արդարադատության համակարգը

Պոլսահայ լրագրող, Հայոց ցեղասպանության մասին հայտարարություններից հետո Թուրքիայի այն ժամանակվա վարչապետ Ահմեթ Դավութօղլուի խորհրդականի պաշտոնից ազատված Էթյեն Մահչուփյանը սուր քննադատության է ենթարկել երկրի արդարադատության համակարգը՝ նշելով, որ հեղաշրջման փորձի հետ կապված դատական մի շարք գործընթացներ պարզապես հակասում են արդարության, խղճի ու օրենքի սկզբունքներին:

Ինչպես գրում է թուրքական T24 կայքը, Մահչուփյանին վրդովվեցրել է հատկապես այն, որ 2016 թ. հուլիսի 15-ին տեղի ունեցած ռազմական հեղաշրջման փորձի ժամանակ ռազմական վարժարանների սաները, որոնք իրենց կամքին հակառակ բերվել էին բախման կետեր, նույնպես ստիպված են կանգնել դատարանի առաջ և պատասխան տալ մի բանի համար, որի հետ բնավ կապ չունեն:

Մահչուփյանը շեշտել է, որ ըստ ականատեսների՝ ուսանողները եղել են վախեցած, ոմանք՝ կիսաքուն և հրամանատարներին հակառակվելու դեպքում էլ կարող էին խիստ պատիժ կրել:

Ավելին՝ լրագրողը զայրույթով նկատել է, որ այս երեխաներին հեղաշրջման գիշերը փողոց հանած բարձրաստիճան պաշտոնյաները մինչ օրս չեն ներկայացել ցուցմունք տալու համար:

«Եթե արդարադատության համակարգը լիներ արդար, իսկ այս երկրում արդարությանը տեր կանգնողները՝ մի փոքր խղճով, շատ բաներ պետք է որ անհանգստացնեին մարդկանց», – գրել է նա:

Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում:

http://www.tert.am/am/news/2018/02/01/mahchupyan/2603251