Դինքի սպանության գործով մեղադրյալները շարունակում են հերքել իրենց առաջադրված մեղադրանքները

Ստամբուլում շարունակվում են պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով դատական լսումները: Նախօրեին տեղի ունեցած դատական նիստի ժամանակ պաշտպանական ճառով հանդես է եկել մեղադրյալներից Տրապիզոնի Ժանդարմերիայի նախկին պաշտոնյա, ենթասպա Վոլքան Շահինը:

Ինչպես գրում է Ստամբուլի հայկական լրատվամիջոցներից Hyetert.org-ը, նա հերքել է իրեն առաջադրված մեղադրանքները, այն է՝ Դինքի սպանության նախապատրաստման մասին տեղեկությունները թաքցնելը, մասնավորապես՝ սպանության կասկածյալներից Էրհան Թունջելի և Թունջայ Ուզունդալի հետ կապի մեջ գտնվելը, և կանխարգելիչ գործողություններ չձեռնարկելը:

Շահինը, պատասխանելով Դինքի ընտանիքի փաստաբան Հաքան Բաքըրջըօղլուի հարցերին, հայտնել է, որ Ուզունդալի և Թունջելի հետ ծանոթացել է պատահաբար՝ Տրապիզոնում ծառայելու ընթացքում։ Նրա խոսքով՝ այս երկու կասկածյալների հետ ինքը շփվել է պարզապես որպես տեղի երկու ուսանող, և սպանության հետ կապված որևէ զրույց չեն ունեցել:

Շահինը նաև հայտնել է, որ Դինքի սպանությունից կարճ ժամանակ անց իրեն է զանգահարել Թունջայ Ուզունդալը և հարցրել Էրհան Թունջելի մասին:

«Հարցրեց՝ «Թունջելին տեսե՞լ ես, մարդ է սպանվել, հենց տեսնես՝ ինձ ասա» , – պատմել է Շահինը:

Դինքի սպանության գործով մեղադրյալների թվում կա 85 մարդ, որոնցից 11-ը կալանքի տակ է, 10-ն ազատության մեջ է, մնացածը՝ ձերբակալված:

Հիշեցնենք, որ Հրանտ Դինքը սպանվել է 2007 թ. հունվարի 19-ին, խմբագրության առջև:

http://www.tert.am/am/news/2018/01/31/dink/2601717