«Հավատում եմ, որ համշենական երգը կարող է դիպչել աշխարհի մյուս ծայրում ապրող մարդու սրտին». համշենական խմբի մեներգչի հարցազրույցը թուրքական պարբերականին

Թուրքական «Բիրգյուն» պարբերականը հարցազրույց է անցկացրել համշենական հայտնի խմբերից «Մելուսես»-ի մեներգիչ Քորայ Չելիքի հետ, որը հանդիսատեսին առավել հայտնի է «Կարմի» և «Խադուլիք» երգերով:

«Խադուլիքը» նաև խմբի` 2015 թ. թողարկած ալբոմի անվանումն է, թեև պետք է նշել, որ «Մելուսես» խումբը համշենցի երիտասարդների կողմից ստեղծվել է դեռևս 2009 թ.՝ Ստամբուլում:

Չելիքը զրույցում հատկապես շեշտում է համշենական երաժշտության միջոցով անհետացման եզրին գտնվող Համշենի հայկական բարբառը կենդանացնելու և նոր սերնդին որպես ժառանգություն փոխանցելու կարևոր դերի մասին:

«Այստեղ ցանկանում եմ հատկապես շեշտել Զուղաշի Բերեփեի և Քյազըմ Քոյունջուի անունները, որոնք առաջինն էին Թուրքիայում, որ համշեներենով (նկատի ունի Համշենի հայկական բարբառով-Tert.am) և լազերենով (քարթվելական լեզվախմբի լեզու-Tert.am) երգեր ձայնագրել: Այն տարիներին Զուղաշի Բերեփեի երգած երգերը շատերին տարօրինակ կարող էին թվալ, հանդերձանքը՝ նույնպես: Սակայն այս մարդիկ իսկապես մի ուրիշ պատուհան բացեցին: Անհետացման եզրին գտնվող լեզուներով երգեր երգեցին, այսինքն՝ տաբուներ կոտրեցին», – նշում է Քորայ Չելիքը:

Ըստ նրա՝ համշենական երգի էներգետիկան իր հզորությամբ ունակ է հաղթահարելու հեռավորությունն ու փոխանցվելու անգամ այն մարդուն, որը ծանոթ չէ այդ լեզվին:

«Ես հավատում եմ, որ համշենական երգը կարող է դիպչել աշխարհի մյուս ծայրում ապրող մարդկանց սրտին, ես հավատում եմ դրան», – նշել է համշենցի երաժիշտը:

http://www.tert.am/am/news/2018/01/30/meluses/2601093