Անկարայի դատախազությունը հետաքննություն է սկսել Ցեղասպանությունը ճանաչած Օսման Բայդեմիրի դեմ

Անկարայի հանրապետական դատախազությունը հետաքննություն է սկսել քրդամետ Ժողովուրդների դեմոկրատական կուսակցության պատգամավոր, Հայոց ցեղասպանությունը ճանաչած գործիչ Օսման Բայդեմիրի դեմ: Այս մասին հայտնում է թուրքական Diken պարբերականը:
Պատճառը սոցիալական մեդիայում Աֆրինում թուրքական զինված ուժերի կողմից իրականացվող ռազմական գործողության վերաբերյալ նրա գրառումն է: Բայդեմիրը սոցիալական մեդիայում գրել էր. «Աֆրինը ռմբակոծվում է, որպեսզի թույլ չտան քուրդ ժողովրդին կարգավիճակ ունենալ»:

Պատգամավորը մեջլիսում ելույթի ժամանակ բարձրացրել էր Աֆրինի գործողությունների հետևանքով սպանված քուրդ երեխաների նկարները՝ հարցնելով, թե որն է նրանց մեղքը, միայն քուրդ լինե՞լը:
Դատախազության կողմից հրապարակված հայտարարության մեջ ասվում է, թե Բայդեմիրը թուրքական զինուժին «օկուպանտ» է անվանել, «նվաստացրել է գործողության աջակիցներին», «կոչ է արել ՆԱՏՕ-ին միջամտել Թուրքիայի գործողություններին», «ժողովրդին հորդորել է փողոց դուրս գալ:
Հիշեցնենք, որ Օսման Բայդեմիրը Դիարբեքիրի քաղաքապետ եղած ժամանակ մի քանի անգամ ներողություն էր խնդրել Հայոց ցեղասպանության համար: Նա հայտնի է նաև Դիարբեքիրի հայկական Սուրբ Կիրակոս եկեղեցու վերանորոգման գործում ունեցած մեծ աջակցության համար:
Բայդեմիրը 2014 թ. եկել էր Հայաստան, այցելել Ծիծեռնակաբերդ ու ծաղիկներ խոնարհել անմար կրակի մոտ:

https://armenpress.am/arm/news/920670/ankarayi-datakhazutyuny-hetaqnnutyun-e-sksel-cexaspanutyuny.html