Թրամփն Էրդողանի հետ շատ բացահայտ և բավականին խիստ է խոսել. Պետդեպի խոսնակ

ԱՄՆ պետքարտուղարության խոսնակ Հիզեր Նոյերթը մեկնաբանել է նախօրեին ԱՄՆ-ի և Թուրքիայի նախագահների հեռախոսային զրույցն ու դրա վերաբերյալ թուրքական մամուլում տարածված հակասական լուրերը:
Նոյերթը հայտնել է, որ Սիրիայի Աֆրին շրջանում թուրքական ԶՈւ-ի կողմից իրականացվող ռազմական գործողության առնչությամբ Դոնալդ Թրամփը Ռեջեփ Թայիփ Էրդողանի հետ շատ բացահայտ և խիստ է խոսել՝ իր մտահոգությունը հայտնելով Սիրիայում բռնության աճող ալիքի հետ կապված:
Նշենք, որ հեռախոսազրույցից հետո թուրքական մամուլը Թրամփ-Էրդողան քննարկման մասին տարատեսակ մեկնաբանություններ էր հրապարակել, որոնք իմաստային առումով տարբերվում էին Սպիտակ տան տարածած հաղորդագրությունից: Մասնավորապես՝ թուրքական կողմը բաց էր թողել Թրամփի արտահայտած մտահոգությունների և բախումներից խուսափելու կոչերի մասին տեղեկատվությունը:
Ավելի ուշ Թուրքիայի արտաքին գործերի նախարար Մևլութ Չավուշօղլուն հայտարարել էր, որ Սպիտակ տան տարածած հայտարարությունները չեն համապատասխանում իրականությանն ու, հավանաբար, պատրաստվել են հեռախոսազրույցից առաջ:
«Ընդհանրապես չզարմացա: Մենք և՛ մեր հնչեցրած կոչերը, և՛ տարածած հայտարարությունը հաստատում ենք, նախագահը խոսել է շատ բացահայտ և բավականին խիստ», – ասել է Պետդեպի խոսնակը ճեպազրույցի ժամանակ:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ. ձեռնարկված «Եփրատի վահան» գործողության ժամանակ:

http://www.tert.am/am/news/2018/01/26/trump-erdogan/2597927