Աֆրինի գիւղերուն դէմ օդային բուռն հարուածներ. Էրտողան. «Գործողութիւնը պիտի շարունակուի մինչեւ Ամերիկայի աջակցութիւնը վայելող վերջին ահաբեկիչին մաքրագործումը»

«Մայատին» արբանեակային պատկերասփիւռի կայանը կը հաղորդէ, որ թրքական ռմբաձիգներ երէկ յարձակում գործած են Աֆրինի շրջակայքը գտնուող տասնեակներով գիւղերու դէմ եւ պատճառ դարձած քաղաքայիններու շարքերուն մէջ յաւելեալ զոհերու: Ըստ շրջանի բնակիչներուն, ներկայիս անոնք ինքնապաշտպանութենէն պիտի անցնին յարձակումի:

Քրտական ղեկավարութեամբ Սուրիոյ ժողովրդավարական ուժերը յայտարարեցին, որ Աֆրինի հարաւ-արեւելքը գտնուող Տէյր Սմաանի մօտ սպաննած են 8 թուրք զինուորներ, իսկ թրքական ուժերը յայտարարեցին, որ սպաննած են 8 քիւրտ զինեալներ:

Սուրիոյ ժողովրդավարական ուժերու ղեկավարներէն Ռիտոր Խալիլ «Ռոյթըրզ» լրատու գործակալութեան յայտնած է, թէ քիւրտ զինեալներու կողքին ՏԱՀԵՇ-ի դէմ կռուած ամերիկացիներ, բրիտանացիներ եւ գերմանացիներ միացած են Աֆրինի մէջ թրքական բանակին դէմ կռիւներուն:

Թուրքիոյ նախագահ Ռեճեփ Թայիփ Էրտողան յայտնեց, որ «Ձիթենիի ճիւղ» գործողութիւնը յաջողութեամբ կը շարունակուի` նշելով, որ թրքական ուժերն ու Սուրիական ազատ բանակի խմբաւորումները քայլ առ քայլ կը գրաւեն Աֆրինը: Ան աւելցուց, որ թրքական բանակի գործողութիւնը պիտի շարունակուի մինչեւ Միացեալ Նահանգներու աջակցութիւնը վայելող վերջին «ահաբեկիչին» մաքրագործումը:

ՄԱԿ-ի ընդհանուր քարտուղարի բանբեր Սթեֆան Տիւժարիք յայտնեց, որ ՄԱԿ-ը «մտահոգ» է Աֆրինի մէջ թրքական բանակի գործողութիւններով` Թուրքիան զգուշացնելով քաղաքայինները թիրախ դարձնելէ:

Ան նշեց, որ քաղաքային զոհեր արձանագրուած են եւ շուրջ 6 հազար անձեր տեղահանուած:

http://www.aztagdaily.com/archives/380691