Պոլսո Հայոց պատրիարքարանն իր աջակցությունն է հայտնել Աֆրինում գործողությանը, հայ համայնքը դատապարտել է արված հայտարարությունը

Պոլսո Հայոց պատրիարքությունը հայտարարություն է տարածել սիրիական Աֆրին շրջանում թուրքական ԶՈւ-ի կողմից իրականացվող «Ձիթենու ճյուղ» ռազմական գործողության առնչությամբ, այս մասին տեղեկանում ենք պատրիարքարանի պաշտոնական կայքից:
Հայտարարության մեջ պատրիարքությունն իր աջակցությունն է հայտնել սկսված գործողությանն ու նշել, որ կաղոթեն «խաղաղության և հանգստության համար, որի կարիքն այդքան ունի մարդկությունը»:
Պատրիարքարանի տարածած հայտարարությունը հակասական արձագանքներ է առաջացրել Ստամբուլի հայության շրջանում և խիստ քննադատությունների արժանացել: Ստամբուլահայերի զգալի հատվածը համոզված է, որ պատրիարքարանը ստիպված չէր նման հայտարարություն տարածել և կարող էր լռել՝ այս հարցում մնալով անկողմնակալ:
Պոլսահայ լրագրողներից Արիս Նալջըն սոցցանցերից մեկի իր էջում, մեկնաբանելով պատրիարքության տարածած նամակը, գրել է. «Պատրիարքարանի հոգևորականներն Աստվածաշունչը հակառակ կողմի՞ց են կարդում, թե՞ աչքերով չեն կարդում ընդհանրապես»:
Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը: Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ. ձեռնարկված «Եփրատի վահան» գործողության ժամանակ:

http://www.tert.am/am/news/2018/01/23/patriarchate/2594797