Պատրիարքին իր ձայներով ընտրողը ոչ թե ես, այլ Թուրքիայի հայ համայնքը պետք է լինի. Փայլանը պատասխանել է թուրքական պարբերականին

Թուրքիայի ըննդիմադիր Ժողովրդադեմոկրատական կուսակցության անդամ, Մեջլիսի հայազգի պատգամավոր Կարո Փայլանը հանդես է եկել հատուկ հայտարարությամբ, որով մեկնաբանել է օրեր առաջ թուրքական «Աքշամ» պարբերականի՝ իր դեմ հնչեցրած մեղադրանքները:

Հիշեցնենք, որ օրեր առաջ թուրքական իշխանամետ «Աքշամ» պարբերականն անդրադարձել է Պոլսո Հայոց պատրիարքարանում շարունակվող լարված իրավիճակին և հանդես է եկել հաջակցություն Աթեշյանի ու քարկոծել Կարո Փայլանին:

Ինչպես գրում է Ստամբուլի հայկական պարբերականներից «Ակօսը», Փայլանը նման հրապարակումն անվանել է մանիպուլացիոն՝ նշելով, որ որոշ մութ ուժեր փորձում են նման կերպ ապակողմնորոշել պետությանն ու հասարակությանը:

«Որպես Թուրքիայի հայ համայնք՝ մենք անցյալից մինչ օրս շատ դժվարին ժամանակաշրջաններով ենք անցել: Նման ժամանակներում ունեցել ենք շատ պատվավոր հոգևոր ու աշխարհիկ գործիչներ, որոնք մշտապես հարգանքով են հիշատակվել: Սակայն այսօր որոշ դերակատարներ իրենց ցուցաբերած դիրքորոշմամբ, ցավոք, միայն ամաչեցնում են մեզ», – ասել է Փայլանը:

Անդրադառնալով հայկական սփյուռքի թելադրանքով Պոլսո Հայոց պատրիարքի պաշտոնին Սեպուհ արքեպիսկոպոս Չուլջյանին հաստատելու մտադության մասին մեղադրանքներին, Փայլանը նշել է, որ երբևէ չի եղել պատրիարքի որևէ հավանական թեկնածուի ակնհայտ կողմնակիցը և պայքարում է համայնքի արդար պահանջի՝ պատրիարքի ընտրությունների անցկացման համար:

«Ի հակառակ այդ հոդվածում տեղ գտած պնդումների՝ մինչ օրս երբևէ չեմ հայտարարել պատրիարքի հավանական թեկնածուներից որևէ մեկին աջակցելու մասին: Համայնքի կողմից հարգանք վայելող, իր պարտականություններն արժանավայել կերպով կատարող ցանկացած թեկնածու ինձ համար թանկ է: Իսկ պատրիարքին իր ձայներով ընտրողը ոչ թե ես, այլ Թուրքիայի հայ համայնքը պետք  է լինի», – ասել է Փայլանը:

Իշխանամետ թերթը, մասնավորապես, պնդել էր, թե Փայլանը, համագործակցելով հայկական սփյուռքի հետ, ցանկանում է պատրիարքական աթոռին նստեցնել Հայ առաքելական եկեղեցու Գուգարաց թեմի առաջնորդ Սեպուհ Չուլջյանին, ում սիրում են սփյուռքում և ով, ի տարբերություն Աթեշյանի, ցեղասպանության ճանաչման ջատագով է:

Ըստ պարբերականի՝ հայկական սփյուռքի հակաթուրքական տարրերը փորձում են իրենց ազդեցությունը սփռել Թուրքիայի հայության վրա և այդ հարցում օգտագործում են Կարո Փայլանին:

http://www.tert.am/am/news/2018/01/18/paylan/2591659