«Պատմությունը պետք է թողնել պատմաբաններին». Չավուշօղլուն խոսել է Հայոց ցեղասպանության մասին

Թուրքիայի արտաքին գործերի նախարար Մևլութ Չավուշօղլուն, որը Կորեական թերակղզում տիրող իրավիճակի քննարկման նպատակով 20 երկրների արտգործնախարարների մակարդակով կազմակերպված հանդիպմանը մասնակցության շրջանակում այժմ գտնվում է Կանադայում, իր ելույթի ժամանակ խոսել է նաև Հայոց ցեղասպանության մասին:

Ինչպես գրում է թուրքական Haberler.com կայքը, Չավուշօղլուն հայտարարել է, որ «պատմությունը պետք է թողնել պատմաբաններին», և որ Թուրքիայի խորհրդարանը չի կարող պատմական դեպքերի վերաբերյալ որևէ որոշում կայացնել:

«Թուրքիայի Հանրապետության խորհրդարանը ոչ ոքի պատմության մասին որոշումներ չի կայացնում, չենք էլ կարող կայացնել: Ավելին՝ սկզբունքորեն դեմ ենք դրան: Պատմական հարցերը պետք է թողնել պատմաբաններին: Նման հարցերի շուրջ որոշումներ ընդունելու համար նաև անհրաժեշտ են համապատասխան դատական որոշումներ, որովհետև ցեղասպանությունն իրավական կատեգորիա է»,- ասել է Չավուշօղլուն:
Նրա խոսքով՝ Կանադայում կա ուժեղ հայկական լոբբի, որն ակտիվ գործունեություն է ծավալում Հայոց ցեղասպանության փաստի ճանաչման ուղղությամբ։

http://www.tert.am/am/news/2018/01/16/genocide/2589067